शोभन उवाच- मयैतद्विहितं विप्र श्रद्धाहीनं व्रतोत्तमम् । तेनाहमध्रुवं मन्ये ध्रुवं भवति तच्छृणु
मुचुकुंदस्य दुहिता चंद्रभागा सुशोभना । तस्यै कथय वृत्तांतं ध्रुवमेतद्भविष्यति
कृष्ण उवाच- स श्रुत्वा वचनं तस्य मुचुकुंदपुरं गतः । उवाच सर्वं वृत्तांत्तं चंद्रभागाग्रतो द्विजः
सोमशर्मोवाच - प्रत्यक्षं दयितः कांतस्तव दृष्टो मया शुभे । इंद्रतुल्यमनाधृष्यं दृष्टं तस्य पुरं मया । अध्रुवं तेन तत्प्रोक्तं ध्रुवं भवति तत्कुरु
चंद्रभागोवाच- तत्र मां नय विप्रर्षे पतिदर्शनलालसाम् । आत्मनो व्रतपुण्येन करिष्यामि पुरं ध्रुवम्
आवयोर्द्विजसंयोगो यथा भवति तत्कुरु । प्राप्यते हि महत्पुण्यं कृत्वा योगं वियुक्तयोः
इति श्रुत्वा सह तया सोमशर्मा जगाम ह । आश्रमं वामदेवस्य मंदराचलसंनिधौ
वामदेवोऽशृणोत्सर्वं वृत्तांतं कथितं तयोः । अभ्यषिञ्चच्चन्द्रभागां वेदमंत्रैरथोज्ज्वलाम्
ऋषिमंत्रप्रभावेन विष्णुवासरसेवनात् । दिव्यदेहा बभूवासौ दिव्यां गतिमवाप ह
पत्युः समीपमगमत्प्रहर्षोत्फुल्ललोचना । जहर्ष शोभनोऽतीव दृष्ट्वा कांतां समागताम्
समाहूय स्वके वामे पार्श्वेतां संन्यवेशयत् । अथोवाच प्रियं हर्षाच्चंद्रभागा प्रियं वचः
शृणु कांत हितं वाक्यं यत्पुण्यं विद्यते मयि । अष्टवर्षाधिका जाता यदाहं पितृवेश्मनि
ततः प्रभृति यच्चीर्णं मया चैकादशीव्रतम् । यथोक्तविधिसंयुक्तं श्रद्धायुक्तेन चेतसा । तेन पुण्यप्रभावेन भविष्यति पुरं ध्रुवम्
सर्वकामसमृद्धं च यावदाभूतसंप्लवम् । एवं सा नृपशार्दूल रमते पतिना सह
दिव्यभोगा दिव्यरूपा दिव्याभरणभूषिता । शोभनोऽपि तया सार्द्धं रमते दिव्यविग्रहः
रमाव्रतप्रभावेन मंदराचलसानुनि । चिंतामणिसमा ह्येषा कामधेनुसमाथ वा
रमाभिधाना नृपते तवाग्रे कथिता मया । तस्या माहात्म्यमनघ श्रुतं सर्वं त्वया नृप 6.60.
मया तवाग्रे कथितं माहात्म्यं पापनाशनम् । एकादशीव्रतानां च पक्षयोरुभयोरपि
यथा कृष्णा तथा शुक्ला विभेदं नैव कारयेत् । सेवितैकादशी नॄणां भुक्तिमुक्तिप्रदायिनी
धेनुः श्वेता यथा कृष्णा उभयोः सदृशं पयः । तथैव तुल्यफलदं स्मृतमेकादशीद्वयम्
एकादशीव्रतानां यो माहात्म्यं शृणुते नरः । सर्वपापविनिर्मुक्तो विष्णुलोके महीयते
इति श्रीपाद्मे महापुराणे पंचपंचाशत्साहस्र्यां संहितायामुत्तरखंडे उमापतिनारदसंवादे कार्तिक कृष्णा रमैकादशीनाम षष्टितमोऽध्यायः
युधिष्ठिर उवाच- श्रुतं रमाया माहात्म्यं त्वत्तः कृष्ण यथातथम् । कार्तिके शुक्लपक्षे या तां मे कथय मानद
श्रीकृष्ण उवाच-। शृणु राजन्प्रवक्ष्यामि शुक्ले चोर्जदले तु या । सा यथा नारदे प्रोक्ता ब्रह्मणा लोककारिणा
नारद उवाच - प्रबोधिन्याश्च माहात्म्यं वद विस्तरतो मम । यस्यां जागर्ति गोविंदो धर्मकर्मप्रवर्त्तकः
ब्रह्मोवाच- प्रबोधिन्याश्च माहात्म्यं पापघ्नं पुण्यवर्द्धनम् । मुक्तिप्रदं सुबुद्धीनां शृणुष्व मुनिसत्तम
तावद्गर्जंति तीर्थानि आसमुद्रसरांसि च । यावत्प्रबोधिनी विष्णोस्तिथिर्नायाति कार्तिके
तावद्गर्जंति विप्रेंद्र गंगाभागीरथी क्षितौ । यावन्नायाति पापघ्नी कार्तिके हरिबोधिनी
अश्वमेधसहस्राणि राजसूयशतानि च । एकेनैवोपवासेन प्रबोधिन्या लभेन्नरः
यद्दुर्ल्लभं यदप्राप्यं त्रैलोक्यस्य न गोचरम् । तदप्यप्रार्थितं पुत्रं ददाति हरिबोधिनी