न निवेदयते यस्तु तमाहुर्ब्रह्मघातकम् । उपस्थिते विवाहे च यज्ञे दाने च वासव
मोहाच्चरति विघ्नं यः स मृतो जायते कृमिः । धनं फलति दानेन जीवितं जीवरक्षणात्
रूपमैश्वर्यमारोग्यमहिंसाफलमश्नुते । फलमूलाशनात्पूजां स्वर्गः सत्येन लभ्यते
प्रायोपवेशनाद्राज्यं सर्वत्र सुखमश्नुते । सुखाट्यः शक्रदीक्षायां सुगामी च तृणाशनः
रूपी त्रिषवणस्नायी वायुं पीत्वा क्रतुं लभेत् । नित्यस्नायी भवेद्दक्षः संध्यावेदजपान्वितः
अहिंस्रो याति वैराज्यं नाकपृष्ठमनाशकम् । अग्निप्रवेशी नियतं ब्रह्मलोके महीयते
रसानां प्रतिसंहारे पशून्पुत्रांश्च विंदति । नाके चिरं स वसति उपवासी च यो भवेत्
सततं भूमिशायी यः स लभेदीप्सितां गतिम् । वीरासनं वीरशयं वीरस्थानमुपासतः
अक्षयास्तस्यलोकाः स्युः सर्वकामगमास्तथा । उपवासं च दीक्षां च अभिषेकं च वासव
कृत्वा द्वादशवर्षाणि वीरस्थानाद्विशिष्यते । पावनं चरते धर्मं स्वर्गलोके महीयते
बृहस्पतिमतं पुण्यं ये पठंति द्विजोत्तमाः । तेषां चत्वारि वर्द्धंते आयुर्विद्यायशोबलम्
नारद उवाच- इतींद्राय बृहस्पतिप्रणीतं धर्मशास्त्रकम् । मह्यं भक्ताय संप्रोक्तं महेशेनाखिलं नृप
नारद उवाच- शनिपीडा कथं याति तन्मे वद सुरोत्तम । त्वन्मुखाच्छ्रूयते यद्वै तेन जंतुः प्रमुच्यते
महादेव उवाच- देवर्षे शृणु वृत्तांतं तेन मुच्येत बंधनात् । ग्रहाणां ग्रहराजोऽयं सौरिः सर्वमहेश्वरः
अयं तु देवो विख्यातः कालरूपी महाग्रहः । जटिलो वज्ररोमा च दानवानां भयंकरः
तस्याख्यानं च लोकेऽस्मिन्प्रथितं नास्ति वै प्रभो । मया गुप्तं विशेषेण नोक्तं हि कस्यचित्कदा
रघुवंशेऽति विख्यातो राजा दशरथः पुरा । चक्रवर्ती महावीरः सप्तद्वीपाधिपोऽभवत्
कृत्तिकांते शनिं ज्ञात्वा दैवज्ञैर्ज्ञापितो हि सः । रोहिणीं भेदयित्वा च शनिर्यास्यति सांप्रतम्
शाकटं भेदमत्युग्रं सुरासुरभयंकरम् । द्वादशाब्दं तु दुर्भिक्षं भविष्यति सुदारुणम्
एतच्छ्रुत्वा ततो वाक्यं मंत्रिभिः सह पार्थिवः । मंत्रयामास किमिदं भयंकरमुपस्थितम्
आकुलं च जगद्दृष्ट्वा पौरजानपदादिकम् । ब्रुवंति सर्वतो लोकाः क्षय एष समागतः
देशाः सनगरा ग्रामा भयभीताः समंततः । पप्रच्छ प्रयतो राजा वसिष्ठप्रमुखान्द्विजान्
संविधानं किमत्रास्ति ब्रूत मां हि द्विजोत्तमाः
वसिष्ठ उवाच- प्राजापत्यमृक्षमिदं तस्मिन्भिन्ने कुतः प्रजाः । अयं योगोह्यसाध्यस्तु ब्रह्मशक्रादिभिस्तथा
इति संचिंत्य मनसा साहसं परमं महत् । समादाय धनुर्दिव्यं दिव्यायुधसमन्वितम्
रथमारुह्य वेगेन गतो नक्षत्रमंडलम् । सपादं योजनं लक्षं सूर्यस्योपरि संस्थितम्
रोहिणीपृष्ठमास्थाय राजा दशरथः पुरा । रथे तु कांचने दिव्ये मणिरत्नविभूषिते
हंसवर्णहयैर्युक्ते महाकेतुसमुच्छ्रये । दीप्यमानो महारत्नैः किरीटमुकुटोज्ज्वलः
बभ्राज स तदाकाशे द्वितीय इव भास्करः । आकर्णपूर्णा चापे तु संहारास्त्रं न्ययोजयत्
संहारास्त्रं शनिर्दृष्ट्वा सुरासुरभयंकरम् । हसित्वा तद्भयात्सौरिरिदं वचनमब्रवीत्