वर्मशस्त्रादिकं दत्वा रथं सारथिसंयुतम् । दुर्वारणेन सहितः सैन्यं मुक्त्वोदधेः सुतः
अलक्षितस्ततो गत्वा गुहां गुप्तां तु पार्थिव । मानसोत्तरशैलस्य हररूपं दधार सः
धृत्वा दुर्वारणे रूपं नंदिनः सदृशं तथा । अथारुरुहतुः शैलं छद्मशंकरनंदिनौ
यत्रास्ति शिखरे गौरी सखिभिः सहिता नृप । तमायांतं शरैर्भिन्नं स्कंधमालम्ब्य नंदिनः
रक्ताक्तमंबरं दृष्ट्वा भवानी विस्मिताभवत् । सख्यस्तस्या जयाद्यास्ताः जग्मुस्तं संभ्रमान्विताः
शंकरस्यांतिकं गत्वा पप्रच्छुस्तं सुदुःखिताः । किं जातं तव देवेश केन त्वं संगरे जितः
सशल्यस्त्वं कथं नाथ संसारीव प्ररोदिषि । इत्युक्तः प्रददौ ताभ्यो भूषणानि पृथक्पृथक्
उत्तार्य शनकैरंगात् वासुकिप्रभृतीनि च । गणेशस्कंदशिरसीच्छिन्ने कुक्षौ विलोक्य च
हा स्कंद हा गणेशेति हा रुद्रेत्यंबिकारुदत् । तस्याः सख्यस्ततः सर्वा रुरुदुः शोककर्शिताः
अत्राब्रवीज्जयां नंदी त्वमेनं परिपालय । मणिभद्रो वीरभद्रः पुष्पदंतश्च वीर्यवान्
दंभनो धूमतिमिरः कूष्मांडाद्या रणे हताः । चंडी भृंगी किरीटिश्च महाकालश्च शृंखली
चंडीशो गुप्तनेत्रश्च कालाद्याश्च हता रणे । विनायकस्य स्कंदस्य शिरसी भ्रमता मया
दृष्टे महारणे देवि इत्युक्त्वाथ पुरोक्षिपत् । तच्छ्रुत्वा नंदिनो वाक्यं शिरसी गृह्य पुत्रयोः
पार्वती विललापोच्चैः पुत्रपुत्रेति जल्पती । तारकारे कथं युद्धे हतस्त्वं सिंधुसूनुना
त्वं हि त्रिवासरो देवैः सेनापत्योऽभिषेचितः । तदा त्वया कथं वीर तारकाख्यो निपातितः
नीलकंठेन किं त्यक्तो यतस्त्वं पतितो भुवि । स्नुषामुखं न दृष्टं च मया पुत्रावभाग्यया
न भोगा वत्स ते भुक्ता संसारस्यापि येभवन् । तात हेरंब विघ्नेश लंबोदर गजानन
रणांगणे केन पुत्र सिद्धैः पूज्यो निपातितः । वाहनोऽसौ कुतो वत्स मूषकः केन हिंसितः
एवं विलपती गौरी शिवं प्राह सुदुःखितम् । साक्षाद्रुद्रोऽसि देवेश हरस्त्वं मा भयं कुरु
वृषभः क्व गतो देव हतो जालंधरेण वै । शरजर्जरदेहस्य किं करोमि प्रियं तव
ततः श्रुत्वा वचो देव्या निश्वस्योवाच शंकरः । दीर्घं विनिहतौ पुत्रौ वृथा शोचसि किं प्रिये
अधुना तेंगसंगेन देवि मां त्रातुमर्हसि । शंकरस्य वचः श्रुत्वाऽसमयोचितमातुरम् । प्रत्युवाचांबिका देवं बभाषे नोचितं वचः
महाविषादे पतिते भये च कृते समाधौ वमने महाज्वरे । श्राद्धे प्रयाणे गुरुवृद्धसन्निधौ रतिं बुधाः शंकर वर्जयंति
कथं मां दुःखदुःखार्तां पुत्रशोकेन पीडिताम् । म्लानां बाष्पपरिम्लानां संप्रार्थयसि चातुराम्
भवान्या इति वाक्यानि श्रुत्वा मायामहेश्वरः । उवाच स्वार्थमुद्दिश्य गौर्यारूपेण मोहितः
पुरुषस्यार्तियुक्तस्य न यच्छंति रतिं स्त्रियः । तथैव रौरवे घोरे पतिष्यंति न संशयः
गणशून्यः पुत्रशून्यो धीशून्योऽहं वरानने । सांप्रतं गृह्य शून्योऽहं सर्वशून्योऽस्मि भामिनि
सुजीवितं विहीनोऽहं त्वां प्रष्टुमिह चागतः । स्वं गृहं तु प्रविश्याशु त्यजामि प्रकृतिं स्वकाम्
उत्तिष्ठ नंदिन्संयावस्तीर्थे भव पुरःसरः । त्वं याहि स्वेच्छया कांते प्रकृतिं स्वां परित्यज
इति मायामहेशस्य वचः श्रुत्वांबिका ततः । दीर्घं दध्यो महाश्वासं शोकेन च जडीकृता 6.13.