भर्तृरूपमथास्थाय कलामेतदुवाच ह । मारीच उवाच- सप्तगोदावरीतीरे पवित्रं पापनाशनम्
द्राक्षाराममिति प्रोक्तं यत्र भीमः स्वयं स्थितः । भुक्तिमुक्तिप्रदो नॄणां स्मरणात्पापनाशनः
तत्र गच्छावहे शीघ्रं त्वं तु निर्गच्छ सुंदरि । कलोवाच- इदानीमभिषेकाय प्रवृत्तो नाभिषिक्तवान्
कथमेतादृशं त्वं हि पूर्वानुक्तं वदिष्यसि । प्रकृतेरन्यथाभावमुत्पातं विदुरुत्तमाः
मारीच उवाच- भर्तुरप्रतिकूलत्वं नारीणां धर्म उच्यते । प्रतिकूलानुकूला वा मम शीघ्रं वदस्व तत्
तूष्णींभूत्वाथ सा साध्वी भर्तेत्येव विचार्य तम् । निर्ययौ तेन सा बाला वनमध्ये गता सती
अथ मध्याह्नकालोसौ क्रियतामाह्निकक्रियाः । राक्षसोथ वचः श्रुत्वा नानुष्ठानस्थलं त्विह
यत्र तत्रास्ति गंतव्यमितो गच्छावहे ततः । किंचित्प्रदेशं गत्वा तु गुहां वीक्ष्य सरस्तथा
इह स्थानं हि मे स्थातुं कार्यं स्नानमथ प्रिये । इत्युक्त्वा सरसि स्नात्वा फलाहारं प्रकल्प्य च
भोजनावसरे प्राप्ते कला दध्यावुमां शिवम् । अयं धवो मम न वा इति ध्यानपराभवत्
अथ ध्यानेन तं चोरं निश्चित्य च पतिव्रता । भीतातिनम्रवदना अश्रुपूर्णमुखी तदा
कष्टमापतितं पापमित्युक्त्वा निपापत च । रुदतीं तामथो दृष्ट्वा राक्षसः पापनिश्चयः
धर्षितुं तामथारेभे न चैतद्धर्षणं प्रति । बलात्कारमथो कर्तुं यतमाने तु राक्षसे
आजानुनाभिपर्यंतं शैलस्थानमकल्पयत् । शिला समभवद्वस्त्रं राक्षसो वीक्ष्य तामथ
इत्येवं तां हनिष्यामि खादयिष्याम्यतः परम् । इत्युक्त्वा भ्रामयित्वासिं शिरश्छेत्तुं प्रचक्रमे
कलाहं मत्पतिर्ज्ञात्वा शापं दास्यति मा हर । इत्युक्तमात्रे वचसि शिरश्चिच्छेद राक्षसः
प्राप्ता यां दुर्मृतिं तस्यामथ शैवाः समागताः । दूता विचित्राभरणाः सर्वायुधधराः शुभाः
एतां विमानमारोप्य शिवालोकमुपागमन् । तामागतां गिरिसुता हर्षेण प्रतिपूज्य च
स्वपादप्रणतां शुद्धामुमा वाक्यमभाषत । पातिव्रत्येन ते तुष्टा अभीष्टं प्रददामि ते
कलोवाच- दासीभावं प्रयच्छ त्वं त्वत्पादाब्जं मम प्रियम् । प्रार्थ्यैःकिमन्यैर्बहुभिस्तथास्त्विति शिवाब्रवीत्
इंद्रादिवनिताभिः सा पूजिताथ कलानिधिः । एतस्मिन्नंतरे प्राप्तः शोणो मुनिरथो गृहम्
न तत्र दृष्ट्वा तां भार्यां ध्यानयोगपरोभवत् । रक्षोहृतां मृतां प्राप्तां शिवालोकमुमां प्रति
उमादत्तवरां चापि दृष्टवाञ्ज्ञानचक्षुषा । किंचिद्दुःखश्चिरं ध्यात्वा परावृत्य मुनिस्तदा
श्वशुरं गतवान्सोऽथ देवरातं मुनीश्वरः । निवेद्य सर्वं सहितो विश्वामित्रमगान्मुनिम्
निवेद्य तद्वसिष्ठस्य वसिष्ठोऽप्याह तान्मुनीन् । गत्वा कैलासमादौ तु दृष्ट्वा देवं महेश्वरम्
अनुज्ञां शिवतो लब्ध्वा पार्वतीमंदिरे गताः । देव्यै विज्ञाप्य तत्सर्वं यथार्थं प्रवदामतत्
तथेत्युक्त्वा मुनिवराः कैलासं शंकरालयम् । गत्वा प्रणम्य देवेशं वीरभद्रेण पूजिताः
विज्ञापयामासुरिदं शोणभार्य्याहृतेति च । शिवः प्राह मुनींद्रास्तांञ्ज्ञातमेव मया त्विदम्
अकालमरणं त्वस्या आयुर्वर्षशतं स्थितम् । अकालमृत्युयुक्तानां पुनर्ज्जीवनमस्ति च
दशपुत्रप्रसूर्वीरा रूपसौभाग्यवत्यपि । भवद्भिरिति निश्चित्य समागतमिह द्विजाः