इति श्रीपद्मपुराणे पातालखंडे वैशाखमाहात्म्ये नवनवतितमोऽध्यायः
श्रीराजोवाच- क्षीरोदजलतुल्याभिः शीतलामलदृष्टिभिः । तथ्याभिश्च विचित्राभिस्त्वया गीर्भिः प्रबोधितः
असागरोत्थं पीयूषमद्रव्यं व्यसनौषधम् । त्वयाहं पायितः सौम्य भवरोगनिवारणम्
हर्षप्रदो नृणां पापहानिकृज्जीवनौषधम् । जरामृत्युहरो विप्र सद्भिः किल समागमः
यानि यानि दुरापानि वांछितानि महीतले । प्राप्यंते तानि तान्येव साधूनामेव संगमात्
यः स्नातः पापहरया साधुसंगम गंगया । किं तस्य दानैः किं तीर्थैः किं तपोभिः किमध्वरैः
निमज्ज्योन्मज्जतान्नॄणां भवाब्धौ परमायनम् । संतो धर्मविदः शांता नौर्दृढे वाप्सुमज्जताम्
यो मे भावःपुरा ह्यासीत्कामैकसुखलालसः । दर्शनाद्वचनात्तेऽद्य विपरीतोऽभवद्विभो
एकजन्मसुखस्यार्थे सहस्राणि विलोपयेत् । प्राज्ञो जन्मसहस्राणि संचिनोत्येकजन्मना
हाहा कामरसास्वाद सुखलालसचेतसा । मया मूढेन न कृतं किंचिदात्महितं द्विज
अहो मे मनसो मोहो येनात्मा योषितां कृते । पातितो व्यसने घोरे दुःखोदर्के दुरत्यये
भगवन्परितुष्टोऽस्मि बोधितो वचनेन ते । उपदेशप्रदानेन मामुद्धर्तुमिहार्हसि
पुरा चरितपुण्योऽहं भवता बोधितोऽस्मि यत् । त्वत्पादरजसा वापि विशेषादपि पावितः
विधिं माधवमासस्य ब्रूहि मे वदतां वर । सर्वपापक्षयकरो यस्त्वया परिकीर्तितः
किं दानं तत्र किं स्नानं को देवो नियमास्तु के । एतदाचक्ष्व विप्रर्षे दुरितोत्तारणाय मे
यम उवाच- इत्येवमुक्तो भगवान्कश्यपः स दयानिधिः । प्रोवाच वचनं विप्र धर्म्यं विश्वहितं शुभम्
कश्यप उवाच- पूर्वापरसमाधान क्षमबुद्ध्या च ते नृप । पृष्टं प्राज्ञे न वक्तव्यं नाधमे पापमानसे
पापप्रवृत्तस्य तथा दत्वा भूप शुभां मतिम् । विद्यादानफलं सम्यक्प्राप्यते नात्र संशयः
नापृष्टः कस्यचिद्ब्रूयान्न चान्यायेन पृच्छतः । जानन्नपि हि मेधावी जडवल्लोकमाचरेत्
विदुषामपि शिष्याणां पुत्राणां च क्रियावताम् । अपृष्टमपि वक्तव्यं श्रेयः श्रद्धावतां हितम्
सांप्रतं शुद्धहृदयो जातस्त्वं वचनान्मम । पुराचरितपुण्येन केनापि च महीपते
पापावस्थं शरीरं तद्गतं तव ममाश्रयात् । श्रवणाद्धर्मशास्त्रस्य धर्मावस्थं तु तेऽभवत्
पापावस्थमधर्माख्यं धर्मज्ञानविवर्जितम् । अपरं सद्व्रतं यद्धि विज्ञेयं तद्धि धार्मिकम्
धर्माधर्मोपभोगाय तत्तृतीयमतींद्रियम् । तत्त्रिभेदं शरीरं हि धर्म्मविद्भिरिहोच्यते
यावता धर्मभोगश्च मुक्तिश्चैतत्त्रिभेदकम् । पापावस्थं शरीरं तत्पापसंज्ञं तदुच्यते
इदानीं गुरुभक्तिं च कुर्वतश्च वचो मम । शृण्वतो धर्मरूपं तु शरीरं ते व्यवस्थितम्
तेनैव शुद्धिरमला जाता धर्मक्रियोचिता । दैवेन देहिनां नाम चेतांसि चरितानि च
शरीराणि च पुष्यंति कालेकाले विपर्ययम् । सांप्रतं भवतश्चेतो नूनं धर्मे प्रवर्तते
तेन त्वां कारयिष्यामि माधवस्नानमुत्तमम् । यम उवाच-। ततस्तु कारितस्तेन कश्यपेन पुरोधसा
स नृपो माधवे मासि स्नानं दानं च पूजनम् । यथादृष्टं पुरा शास्त्रे वैशाखस्नानजं विधिम्