शालग्रामद्वारकायां स्थिताय गदिने नमः । एकेन लक्षितो योव्याद्गदाधारी सुदर्शनः
लक्ष्मीनारायणो द्वाभ्यां त्रिभिश्चैव त्रिविक्रमः । चतुर्भिश्च चतुर्व्यूहो वासुदेवश्च पंचभिः
प्रद्युम्नः षड्भिरेवाव्यात्संकर्षणश्च सप्तभिः । पुरुषोत्तमोऽष्टभिश्च स्यान्नवव्यूहो नवो हितः
दशावतारो दशभिरनिरुद्धोऽवतादथ । द्वादशात्मा द्वादशभिरतऊर्द्ध्वमनंतकः
ब्रह्मा चतुर्मुखो दंडी कमंडलुस्रगुन्नतः । महेश्वरः पंचवक्त्रो दशबाहुर्वृषध्वजः
यथायुधस्तथागौरी चंडिका च सरस्वती । महालक्ष्मीर्मातरश्च पद्महस्तो दिवाकरः
गजास्यश्च गजस्कंधः षण्मुखोनेकधा गणाः । एते स्थिताः स्थापिता स्युः प्रसादेवाथ पूजिताः
धर्मार्थकाममोक्षा हि प्राप्यंते पुरुषेण च
इति श्रीपद्मपुराणे पातालखंडे शालग्रामनिर्णयोनामाष्टसप्ततितमोऽध्यायः
ईश्वर उवाच- शालग्रामे मणौयंत्रे मंडले प्रतिमासु च । नित्यं तु श्रीहरेः पूजा केवले भवनेन तु
गंडक्यामेकदेशे तु शालग्रामस्थलं महत् । पाषाणं तद्भवं पातु शालग्राममिति स्थितम्
शालग्रामशिलास्पर्शात्कोटिजन्माघनाशनम् । किं पुनः पूजनं तत्र हरेः सांनिध्यकारणम्
शालग्रामैकयजनाच्छतलिंगीफलं लभेत् । बहुभिर्जन्मभिः पुण्यैर्यदिकृष्णशिलां लभेत्
गोष्पदेन च चिह्नेन जनुस्तेन समाप्यते । आदौ शिलां परीक्षेत स्निग्धां श्रेष्ठां च मेचकाम्
आकृष्णा मध्यमा प्रोक्ता मिश्रा मिश्रफलप्रदा । सदा काष्ठे स्थितो वह्निर्मथनेन प्रकाश्यते
यथा तथा हरिर्व्यापी शालग्रामे प्रतीयते । प्रत्यहं द्वादशशिलाः शालग्रामस्य योऽर्चयेत्
द्वारवत्याः शिलायुक्ताः स वैकुंठे महीयते । शालग्रामशिलायां तु गह्वरं लक्षते नरः
पितरस्तस्य तिष्ठंति तृप्ताः कल्पांतकं दिवि । वैकुंठभवनं तत्र यत्र द्वारावती शिला
मृतो विष्णुपुरं याति तत्तीर्थं योजनत्रयम् । जपः पूजा च होमश्च सर्वं कोटिगुणं भवेत्
मनस्कामसमाभीष्टं क्रोशमात्रं न संशयः । कीटकोऽपि मृतिं याति वैकुंठभवनं यतः
शालग्रामशिलायां यो मूल्यमुद्घाटयेन्नरः । विक्रेता चानुमंता च यः परीक्षानुमोदकः
सर्वे ते नरकं यांति यावत्सूर्यश्च संप्लवः । अतस्तद्वर्जयेद्देवि चक्रक्रयणविक्रयम्
शालग्रामोद्भवो देवो यो देवो द्वारकोद्भवः । उभयोः संगमो यत्र मुक्तिस्तत्र न संशयः
द्वारकोद्भवचक्राढ्यो बहुचक्रेण चिह्नितः । चक्रासनशिलाकारचित्स्वरूपो निरंजनः
नमोऽस्त्वोंकाररूपाय सदानंदस्वरूपिणे । शालग्राममहाभाग भक्तस्यानुग्रहं कुरु
तवानुग्रहकामस्य ऋणग्रस्तस्य मे प्रभो । अतः परं प्रवक्ष्यामि तिलकस्य विधिं मुदा
यच्छ्रुत्वा मानवाः सर्वे विष्णुसारूप्यमाप्नुयुः । ललाटे केशवं विद्यात्कंठे श्रीपुरुषोत्तमम्
नाभौ नारायणं देवं वैकुंठं हृदये तथा । दामोदरं वामपार्श्वे दक्षिणे च त्रिविक्रमम्
मूर्ध्नि चैव हृषीकेशं पद्मनाभं च पृष्ठतः । कर्णयोर्यमुनां गंगां बाह्वोः कृष्णं हरिं तथा
यथास्थानेषु तुष्यंति देवता द्वादश स्मृताः । द्वादशैतानि नामानि कर्तव्ये तिलके पठेत्