फाल्गुनादिप्रतिपदश्चतुर्थ्यंतं चतुर्दिनैः
पंचम्याः सप्तमी यावदतिकायवधस्तथा
निकुंभकुंभावूर्ध्वं तु मकराक्षस्त्रिभिर्दिनैः
तृतीयादिसप्तम्यंतं दिनपंचकमेव च
ततस्त्रयोदशीयावद्दिनैः पंचभिरिंद्रजित्
चतुर्दश्यां दशग्रीवो दीक्षां प्रापावहारतः
चैत्रशुक्लप्रतिपदः पंचमीदिनपंचकैः
चैत्रषष्ठ्याष्टमी यावन्महापार्श्वादि मारणम्
कोपाविष्टेन रामेण द्रावितो दशकंधरः
दशम्यामवहारोभूद्रात्रौ युद्धे तु रक्षसाम्
प्रेरितो वासवेनाजावर्पयामास भक्तितः
अष्टादशदिनै रामो रावणं द्वैरथेऽवधीत्
माघशुक्लद्वितीयायाश्चैत्रकृष्ण चतुर्दशीम्
युद्धावहारः संग्रामो द्वासप्तति दिनान्यभूत्
वैशाखादि तिथौ राम उवास रणभूमिषु
सीताशुद्धिस्तृतीयायां देवेभ्यो वरलंभनम्
गृहीत्वा जानकीं पुण्यां दुःखितां राक्षसेन तु
वैशाखस्य चतुर्थ्यां तु रामः पुष्पकमाश्रितः
पूर्णे चतुर्दशे वर्षे पंचम्यां माधवस्य तु
नंदिग्रामे तु षष्ठ्यां स भरतेन समागतः
दशैकाधिकमासांस्तुचतुर्दशाहानि मैथिली
द्विचत्वारिंशक वर्षे रामो राज्यमकारयत्
स चतुर्दशवर्षांते प्रविश्य च पुरीं प्रभुः
भ्रातृभिः सहितस्तत्र रामो राज्यमथाकरोत्
अगस्त्यः कुंभसंभूतिस्तमागंता रघोः पतिम्
तस्यागमिष्यति हयो ह्याश्रमे तव सुव्रत
तेषामग्रे रामकथाः करिष्यसि मनोहराः
दृष्ट्वा राममयोध्यायां पद्मपत्रनिभेक्षणम्
इत्युक्त्वा मां मुनिवरो लोमशः सर्वबुद्धिमान्
ज्ञातं त्वत्कृपया सर्वं रामचारित्रमद्भुतम्