तीर्थानां तु यथा गंगा प्रजानां तु यथा वणिक् । श्रेष्ठं सर्वव्रतानां तु तद्वन्मासोपवासनम्
सर्वव्रतेषु यत्पुण्यं सर्वतीर्थेषु चैव हि । सर्वदानोद्भवं चैव लभेन्मासोपवासकृत्
अग्निष्टोमादिभिर्यज्ञैर्विविधैर्भूरिदक्षिणैः । न तत्पुण्यमवाप्नोति यन्मासपरिलंघनात्
तेन जप्तं हुतं दत्तं तपस्तप्तं कृतं स्वधा । यः करोति विधानेन नरो मासमुपोषणम्
उद्दिश्य वैष्णवं यज्ञं मामभ्यर्च्य जनार्दनम् । गुरोराज्ञां ततो लब्ध्वा कुर्यान्मासोपवासनम्
वैष्णवानि यथोक्तानि कृत्वा सर्वव्रतानि तु । द्वादश्यादीनि पुण्यानि ततो मासमुपावसेत्
अतिकृच्छ्रं च पाराकं कृत्वा चांद्रायणं ततः । मासोपवासं कुर्वीत गुरोर्विप्राज्ञया ततः
आश्विनस्यामले पक्षे एकादश्यामुपोषितः । व्रतमेनं तु गृह्णीयाद्यावत्त्रिंशद्दिनानि तु
वासुदेवं समभ्यर्च्य कार्तिकं सकलं नरः । मासं चोपवसेद्यस्तु स मुक्तिफलभाग्भवेत्
अच्युतस्यालये भक्त्या त्रिकालं कुमुदैः शुभैः । मालतींदीवर्रैबुध्नैः कमलैश्च सुगंधिभिः
कुसुमोशीरकर्पूरैर्विलिप्य वरचंदनैः । नैवेद्यापूपदीपाद्यैरर्चयेच्च जनार्दनम्
मनसा कर्मणा वाचा पूजयेद्गरुडध्वजम् । कुर्वन्नरः स्त्री विधवा बृहद्भक्तिर्जितेंद्रियः
नाम्नामेव तथालापं विष्णोः कुर्यादहर्निशम् । भक्त्या विष्णोः स्तुतिर्वाच्या मिथ्यालापविवर्जिता
सर्वसत्वदयायुक्तः शांतवृत्तिरहिंसकः । सुप्तो बाह्यासनस्थो वा वासुदेवं प्रकीर्तयेत्
स्मृत्यालोकनगंधादि स्वादनं परिकीर्त्तनम् । अन्नस्य वर्जयेद्वासं ग्रासानां संप्रमोक्षणम्
गात्राभ्यंगं शिरोभ्यंगं तांबूलं सविलेपनम् । व्रतस्थो वर्जयेत्सर्वं यच्चान्यच्च निराकृतम्
न व्रतस्थः स्पृशेत्किंचिद्विकर्मस्थं न चालयेत् । देवतायतने तिष्ठन्न गृहस्थश्चरेत्ध्रुवम्
कृत्वा मासोपवासं तु यथोक्तविधिना नरः । नारी वा विधवा साध्वी वासुदेवं समर्चयेत्
अन्यूनाधिकमेवं तु व्रतं त्रिंशद्दिनैरिदम् । कृत्वा मासोपवासं तु संयतात्मा जितेंद्रियः
ततोऽर्चयेदेव पुण्यं द्वादश्यां गरुडध्वजम् । पूजयेत्पुष्पमालाभिर्गंधधूपविलेपनैः
वस्त्रालंकारवाद्यैश्च तोषयेदच्युतं नरः । संस्नापयेद्धरिं भक्त्या तीर्थचंदनवारिभिः
चंदनेनानुलिप्तांगं धूपपुष्पैरलंकृतम् । वस्त्रदानादिभिश्चैव भोजयित्वा द्विजोत्तमान्
दद्याच्च दक्षिणां तेभ्यः प्रणिपत्य क्षमापयेत् । एवं मासोपवासाद्धि कृत्वाभ्यर्च्य जनार्दनम्
भोजयित्वा द्विजांश्चैव विष्णुलोके महीयते । एवं मासोपवासांते कृत्वा विप्रान्त्रयोदश
निर्यापयेत्ततस्तान्वै विधिना येन तच्छृणु । कारयेद्वैष्णवं यज्ञमेकादश्यामुपोषितः
पूजयित्वा तु देवेशमाचार्यानुज्ञया हरिम् । अर्चयित्वा यथाशक्त्या ह्यभिवाद्य गुरुं तथा
ततोनुभोजयेद्विप्रान्नमस्कारपुरःसरम् । विशुद्धकुलचारित्र विष्णुपूजनतत्परान्
पूजयित्वा तथा सर्वान्भोजयित्वा त्रयोदश । तांबूलवस्त्रयुग्मानि भोजनाच्छादनानि च
योगपट्टानि सूत्राणि ब्रह्मसूत्राणि चैव हि । दद्याच्चैव द्विजाग्र्येभ्यः पूजयित्वा प्रणम्य च
ततोनुपूजयेच्छक्त्या शय्यां स्तरणसंस्कृताम् । साच्छादनां शुभां श्रेष्ठां सोपधानामलंकृताम्