सर्वांश्चैव दुराचारांश्चांडालान्पापकारिणः। दोषांस्त्यक्त्वा नरः पश्चात्सुखी भवति नान्यथा
अज्ञानाद्यदि वा मोहात्कृत्वा पापं सुदारुणं। ततो धर्मं चरेद्यस्तु स गच्छेत्परमां गतिं
पापकृन्न चरेद्धर्मं पापे कुर्यान्मतिं पुनः। शिलानावं यथारूढः सागरे संनिमज्जति
कृत्वा सर्वाणि पापानि तथा दुर्गतिसंचयं। उपशांतो भवेत्पश्चात्तं दोषं शमयिष्यति
तमुवाच महाप्राज्ञं द्विजं मुनिवरोत्तमम्। यदिमां न जहातीह खगः सर्वांश्च बांधवान्
ततः प्राणं च त्यक्ष्यामि खगे मर्मावघातिनि। नोचेत्त्यजतु मे बंधून्प्रतिज्ञा मे दृढात्मनः
ततस्तार्क्ष्यमुवाचेदं मुनि र्ब्रह्मवधे भयात्। उद्वमैतान्सविप्रांश्च म्लेछानेतान्समंततः
वनेषु पर्वतान्तेषु दिक्षु तान्पतगेश्वर। उद्ववाम ततः शीघ्रं दोषज्ञः पितुराज्ञया
ततः सर्वेऽभवन्व्यक्ता अकेशाः श्मश्रुवर्जिताः। यवना भोजनप्रीताः किंचिच्छ्मश्रुयुताश्च ये
अग्नौ च नग्नकाः पापा दक्षिणस्यामवाचकाः। घोराः प्राणिवधे प्रीता दुरात्मानो गवाशिनः
नैर्ऋते कुवदाः पापा गोब्राह्मणवधोद्यताः। खर्पराः पश्चिमे पूर्वे निवसंति च दारुणाः
वायव्यां च तुरुष्काश्च श्मश्रुपूर्णा गवाशिनः। अश्वपृष्ठसमारूढाः प्रयुद्धेष्वनिवर्तिनः
उत्तरस्यां च गिरयो म्लेच्छाः पर्वतवासिनः। सर्वभक्षा दुराचाराः वधबंधरताः किल
ऐशान्यां निरयास्संति कर्तॄणां वृक्षवासिनः। एते म्लेच्छा स्थिता दिक्षु घोरास्ते शस्त्रपाणयः
येषां च स्पर्शमात्रेण सचेलो जलमाविशेत्। एतेषां च कलौ देशेप्यकाले धर्मवर्जिते
संस्पर्शं च प्रकुर्वंति वित्तलोभात्समंततः। म्लेच्छांस्तान्मोचयित्वा तु क्षुधया परिपीडितः
पुनराह द्विजस्तात क्षुधा मे बाधतेतराम्। अवदद्गरुडं तत्र कश्यपः कृपया द्रुतम्
तिष्ठंतौ विपुलौ तत्र जिघांसू गजकच्छपौ। अप्रमेयौ महासत्वौ सागरस्यैकदेशतः
तावप्सु च द्रुतं वत्स क्षुधां ते वारयिष्यतः। स पितुर्वचनं श्रुत्वा तत्र गत्वाभिपद्य तौ
नखैर्भित्वा कूर्मगजौ महासत्वौ महाजवः। खमुत्पपात तौ धृत्वा विद्युद्वेगो महाबलः
आधारतां न गच्छंति नगाश्च मंदरादयः। ततो योजनलक्षे द्वे गत्वा मारुतरंहसा
महत्यां जंबुशाखायां निपपात महाबलः। भग्ना सा सहसा शाखा तां पतंतीं खगेश्वरः
गोब्राह्मणवधाद्भीतो दधार तरसा बली। धृत्वा तां रुचिरं वेगाद्द्रवंतं खे महाबलम्
गत्वा विष्णुरुवाचेदं नररूपधरो हरिः। कस्त्वं भ्रमसि चाकाशे किमर्थं पतगेश्वर
विधृत्य महतीं शाखां महांतौ गजकच्छपौ। तमुवाच द्विजस्तस्मिन्नररूपधरं हरिम्
गरुडोहं महाबाहो खगरूपः स्वकर्मणा। कश्यपस्य मुनेस्सूनुर्विनतागर्भसंभवः
पश्यैतौ च महासत्वौ भक्षणार्थं मया धृतौ। न धरा च ममाधारो न वृक्षा न च पर्वताः
अनेकयोजनान्यूर्ध्वं दृष्ट्वा जंबूमहीरुहम्। अपतंतस्य शाखायां सहेमौ परिभक्षितुं
भग्ना सा सहसा शाखा तां च धृत्वा भ्रमाम्यहम्। कोटिकोटिसहस्राणां ब्राह्मणानां गवां वधात्
भयं तत्र विषादो मे सहसा प्राविशद्बुध। किं करोमि कथं यामि को मे वेगं सहिष्यति