मरुकोदमनकश्चैव सद्यस्तुष्टिकरो हरेः । अतः पूजा प्रकर्त्तव्या वैष्णवैर्नरसत्तमैः
गोसहस्रं कृतं तेन कन्यादानं तथैव च । पृथ्वीदानं कृतं तेन विष्णोर्वै पूजने कृते
एकामेकां गृहीत्वा तु मंजरीं दमनस्य तु । यः पूजयति देवेशं संप्राप्ते मधुमाधवे
पुण्यसंख्यां न जाने वै तस्याहं नगनंदिनि । स वै चतुर्भुजो भूत्वा इह लोके परत्र च । धर्मानर्थांश्च कामांश्च प्रभुंक्ते वैष्णवं पदम्
इति श्रीपाद्मेमहापुराणे पंचपंचाशत्साहस्र्यां संहितायामुत्तरखंडे दमनकमहोत्सवो नाम चतुरशीतितमोऽध्यायः
सूतउवाच- अतःपरं कार्तिकमाहात्म्यं प्रस्तूयते । सूत उवाच- एकदा द्वारकामागादृषिः कृष्णदिदृक्षया । पुष्पाण्यादाय दिव्यानि कल्पवृक्षोत्थितानि च
नारदं स्वागतेनासौ कृष्णः सत्कारमाचरत् । इदमर्घ्यमिदं पाद्यमित्युवाचासनंददत्
नारदस्तानि पुष्पाणि कृष्णायोपाजहार च । कृष्णः षोडशसाहस्रस्त्रीभ्यस्तानि व्यभज्यत
विस्मृत्य सत्यभामां तु सर्वाभ्यस्तान्यदात्प्रभुः । सत्यभामा ततः क्रुद्धा क्रोधागारं समाविशत्
समाज्ञाय ततः कृष्णस्तत्र गत्वा समाहितः । सत्यभामां मानयित्वा गरुडं मनसा स्मरन्
स्मृतमात्रस्तु गरुडस्तदागत्याग्रतः स्थितः । आरुह्य वेगात्पत्रं तमित्युवाच प्रियां प्रभुः
सत्ये त्वं माकृथाः क्रोधं त्वत्कृते देवतैः सह । विरुध्य देवराजानं रोपयिष्ये तवांगणे
कल्पद्रुमं महाभागेऽपराधं मे क्षमां कुरु । इति कृत्वा प्रतिज्ञां तु कृष्णः स सत्यभामया
देवलोकमगात्तूर्णं यत्र देवः स वृत्रहा । याचितः कल्पवृक्षार्थमुत्तरं दत्तवान्प्रभुम्
नायं देवद्रुमो भूम्यां प्राप्तुं योग्यस्त्वया प्रभो । तदा क्रुद्धो महाबाहुर्वृक्षमुत्पाट्य मूलतः
वाहमारोपयामास वेगेन बलवत्तरः । तदा वज्रधरो वेगाद्वज्रमुद्यम्य वीर्यवान्
गरुडं ताडयामास कल्पवृक्षं त्यजेरिति । तदा पत्ररथः पत्रं कुलिशस्यापि गौरवात्
एकं विसर्जयामास त्वरया प्रजगाम च । तेन वज्रप्रहारेण त्रयोभूव पतत्रिणः
मयूरो नकुलश्चाषः कृष्णो द्वारावतीमगात् । आगत्य सत्यभामाया गृहे चैनमरोपयत् । तदैव नारदोऽभ्यागात्सत्यया मानितो बहु
सत्यभामोवाच- ईदृशः कल्पवृक्षोऽयं पतिरेतादृशः प्रभुः । भवेभवे कथं प्राप्यस्तदाख्यातु भवान्मम
इति पृष्टस्तदा प्राह नारदो मुनिसत्तमः । प्राप्यते सत्यभामेऽयं तुलापुरुष दानतः
सत्यभामा तदा कृष्णं कल्पवृक्षसमन्वितम् । नारदायैव सा प्रादात्तोलयित्वा विधानतः । सर्वोपस्करमाकृष्य नारदस्त्रिदिवं ययौ
सूत उवाच- श्रियःपतिमथामंत्र्य गते देवर्षिसत्तमे । हर्षोत्फुल्लानना सत्या वासुदेवमथाब्रवीत्
सत्यभामोवाच- धन्यास्मि कृतकृत्यास्मि सफलं जीवितं च मे । मज्जन्मनि निदाने च धन्यौ तौ पितरौ मम
यौ मां त्रैलोकसुभगां जनयामासतुर्ध्रुवम् । षोडशस्त्रीसहस्राणां वल्लभाहं यतस्तव
यस्मान्मयादिपुरुषः कल्पवृक्षसमन्वितः । यथोक्तविधिना सम्यङ्नारदाय समर्पितः
यद्वार्तामपि जानंति भूमिसंस्थान जंतवः । सोऽयं कल्पद्रुमो गेहे मम तिष्ठति सांप्रतम्
त्रैलोक्याधिपतेश्चाहं श्रीपतेरतिवल्लभा । अतोऽहं प्रष्टुमिच्छामि किंचित्त्वां मधुसूदन
यदि त्वं मत्प्रियकरः कथयस्वात्र विस्तरात् । श्रुत्वा तच्च पुनश्चाहं करोमि हितमात्मनः
यथाकल्पं त्वया देव वियुक्ता स्यां न कर्हिचित् । सूत उवाच- इति प्रियावचः श्रुत्वा स्मेरास्योऽयं गदाग्रजः