ब्राह्मे मुहूर्ते चोत्त्थाय बद्धपद्मासनास्तु ते। ध्यात्वा गुरुं सहस्रारे श्वेतवस्त्रोपवीतकम्
श्वेतमाल्यांबरधरं श्वेतगंधानुलेपनम्। निर्गम्य च बहिर्नद्यां कुर्युर्नित्यमतन्द्रिताः
क्षीरवृक्षोत्थमाचार्यो दापयेद्दन्तधावनम्। ते च तं भक्षयेयुर्हि नदीं गत्वा समुद्रगाम्
इतरद्वा तटाकं वा गृहे वापि विधानतः। तद्भक्षयेयुर्मंत्रेण मंत्रितं परमेष्ठिनः
आपोहिष्ठेति मंत्रेण सप्तकृत्वोभिमंत्रितं। देवस्य त्वेति वै जप्त्वा युंजानेति करे न्यसेत्
इरावत्येति प्रक्षाल्य ब्रह्मोदनेति वै मुखे। भक्षयित्वा क्षिपेद्दूरं पतितं च निरीक्षयेत्
सम्मुखं प्राङ्मुखं वापि विदिशं चापि वा गतम्। संमुखे देवतालब्धिर्मंत्रसिद्धिश्च जायते
पराङ्मुखे दंतकाष्ठे सर्वे देवाः पराङ्मुखाः। उत्तरेण गते तस्मिन्सिद्धिर्भवति वा न वा
दक्षिणेन भवेन्मृत्युर्गुरोस्तस्य न संशयः। प्रेक्ष्याशुभं स्वपेद्भूमौ देवदेवस्य सन्निधौ
स्वप्नान्दृष्ट्वा गुरोरग्रे श्रावयेयुर्विचक्षणाः। ततः शुभाशुभं तत्र लक्षयेत्परमो गुरुः
पौर्णमास्यामथ स्नात्वा ततो देवालयं व्रजेत्। गुरुश्च मंडलं भूमौ कल्पितायां तु वर्तयेत्
लक्षणैर्विविधैर्भूमिं लक्षयित्वा विधानतः। षोडशारं लिखेत्पद्मं नवधारमथापि वा
अष्टपत्रमथो वापि लिखित्त्वा दर्शयेद्बुधः। नेत्रबंधं तु कुर्वीत सितवस्त्रेण यत्नतः
वर्णानुक्रमतः शिष्यान्पुष्पहस्तान्प्रवेशयेत्। नवनाभं यदा कुर्यान्मंडलं वर्णकैर्बुधः
इंद्राणीपूर्वकं देवमिंद्रमैंद्र्यां तु पूजयेत्। लोकपालैः समं तद्वदग्निं संपूजयेन्नृप
दिशि वह्नेर्यमं याम्यां नैऋत्यां चैव निर्ऋतिम्। वरुणं वारुणाशायां वायुं वायव्यगोचरे
धनदं चोत्तरे न्यस्य रुद्रमीशानगोचरे। कमंडलुं पूर्वतो हि स्रुचं वै दक्षिणे तथा
हंसं वै पश्चिमायां तु उत्तरायां स्रुवं तथा। आग्नेय्यां च ब्रसीं दद्यान्नैर्ऋत्यां पादुके तथा
वायव्यां योगपट्टं च ऐशान्यां च गलंतिकाम्। विष्णुस्तु पूर्वतः पूज्यो दक्षिणे चापि शंकरः
पश्चिमे तु रविर्देव ऋषयश्चोत्तरे तथा। मध्ये स्वयं पद्मजन्मा सावित्री दक्षिणे तथा
उत्तरे चैव गायत्री देवी पद्मदलेक्षणा। ऋग्वेदं पूर्वतो न्यस्य यजुर्वेदं च दक्षिणे
पश्चिमे सामवेदं च अथर्वं चोत्तरे तथा। इतिहासपुराणानिच्छंदोज्यौतिषमेवच
धर्मशास्त्राणि चान्यानि इंद्रादि दिक्षु विन्यसेत्। पूर्वपत्रे बलं पूज्य प्रद्युम्नं दक्षिणे दले
पश्चिमे चानिरुद्धं च वासुदेवमथोत्तरे। पूर्वतो वामदेवं च सद्योजातं तु दक्षिणे
ईशानं पश्चिमे स्थाप्य तत्पुरुषं चोत्तरे तथा। अघोरस्सर्वतः पूज्य एषा पूजा तु मंडले
पूर्वतो भास्करं पूज्य दक्षिणेन दिवाकरं। प्रभाकरं पश्चिमे तु ग्रहराजमथोत्तरे
एवं पूज्य विधानेन ब्रह्माणं परमेश्वरम्। दिङ्मंडले तु विन्यस्य अष्टौ कुंभान्विधानतः
ब्राह्मं तु कलशं मध्ये नवमं तत्र कल्पयेत्। स्नापयेन्मुक्तिकामं तु ब्रह्मणो वै घटेन तु
श्रीकामं वैष्णवेनेह कलशेन तु पार्थिव। राज्यार्थिनं स्नापयेच्च ऐंद्रेण कलशेन तु
द्रव्यप्रतापकामं तु आग्नेय घटवारिणा। मृत्युंजयविधानाय याम्येन स्नापयेन्नरम्