बालवृन्दी मर्कवृन्दी चकिताक्षः पलायितः
दामोदरो ऽप्रमेयात्मा दयालुर्भक्तवत्सलः
वृक्षभङ्गी शोकभङ्गी धनदात्मजमोक्षणः
व्रजकोलाहलकरो व्रजानदविवर्द्धनः
वत्सपालो वत्सपतिर्गोपदारकमण्डनः
पीताम्बरो हेममाली मणिमुक्ताविभूषणः
वत्सासुरपतिध्वंसी बकासुरविनाशनः
आद्य आत्मप्रदः संगी यमुनातीरभोजनः
कृतहस्ततलग्रासो व्यञ्जनाश्रितशाखिकः
मयूरपिच्छमुकुटो वनमालाविभूषितः
कोटिकन्दर्पलावण्यो लसन्मकरकुण्डलः
कोटिसागरगाभीर्यः कालकालः सदाशिवः
ब्रह्माण्डकोटिजनको ब्रह्ममोहविनाशकः
गिरिपूजोपदेष्टा च धृतगोवर्द्धनाचलः
सर्वतीर्थाभिषिक्तश्च गोविन्दो गोपरक्षकः
धेनुकारिः प्रलंबारिर्वृषासुरविमर्दनः
गोपगोप्ता धेनुगोप्ता दावाग्निपरिशोषकः
यज्ञपत्न्यन्नभोजी च मुनिमानापहारकः
गन्धर्वशापमोक्ता च शङ्खचूडशिरोहरः
सर्वगोप्ता समाह्वानः सर्वगोपीमनोरथः
रासक्रीडारसास्वादी रसिको राधिकाधवः
सर्वगोपीजनानन्दी गोपीजनविमोहनः
गोपीस्कन्धाश्रितकरो गोपिकाचुंबनप्रियः
गोपिकाकेशसंस्कारी गोपिकापुष्पसंस्तरः
गोपिकामदहारी च गोपिकापरमार्जितः
गोपिकावन्दितपदो गोपिकावशवर्तनः
कुञ्जप्रियः कुञ्जवासी वृन्दावनविकासनः
शशिसंस्तंभनः शूरः कामी कामविमोहनः
कामदः कामरूपश्च कामिनीकामसंचयः
परमात्मा पराधीशः सर्वकारणकारणः (म्)