कट्यां जान्वोर्जङ्घयोश्च गुल्फयोः पादयोस्तथा
वदने चिबुके कण्ठे दोर्मूले विन्यसेत्क्रमात्
पादयोर्गुल्फयोश्चैव जङ्घयोर्जानुनोस्तथा
दोर्मूले कण्ठदेशे च चिबुके वदने नसोः
मूर्ध्नि न्यसेन्मन्त्रवर्णान्संहाराख्यो ऽयमीरितः
मूर्तिपञ्जरनामानं विन्यसेत्पूर्ववत्ततः
द्वारवत्यां सहस्रार्कभास्वरैर्भवनोत्तमैः
ज्वलद्रत्न मयस्तंभद्वारतोरणकुड्यके
पद्मरागस्थलीराजद्रत्नसंघैश्च मध्यतः
रत्नप्रदीपावलिभिः प्रदीपितदिगन्तरे
समासीनो ऽच्युतो ध्येयो द्रुतहाटकसन्निभः
सर्वाङ्गसुंदरः सौम्यः सर्वाभरणभूषितः
अनाहतोच्छलद्रत्नधारौघकलशं स्पृशन्
रुक्मिणीसत्यभामे ऽस्य मूर्ध्नि रत्नौघधारया
नाग्नजिती सुनन्दा च दिशन्त्यौ कलशौ तयोः
रत्ननद्याः समुद्धृत्य रत्नपूर्णौं घटौ तयोः
बहिः षोडश साहस्रसंख्याकाः परितः प्रियाः
तद्बहिश्चाष्टनिधायः पूरयन्तो धनैर्धराम्
एवं ध्यात्वा जपेल्लक्षपञ्चकं तद्दशांशतः
विलिप्य गन्धपङ्केन लिखेदष्टदलांबुजम्
शिष्टैस्तु सप्तदशभिरक्षरैर्वेष्टयेत्स्वरम्
षट्सु संधिषु षट्कर्णे केसरेषु त्रिशस्त्रिशः
षटूषः संलिख्य तद्बाह्ये वेष्टयेन्मातृकाक्षरैः
भूग्रहं चतुरस्रं स्यादष्टवज्रविभूषितम्
संस्कृतं धारयेद्यो वै सोर्ऽच्यते त्रिदशैरपि
विद्महेधीमहियुतौ तन्नो ऽनङ्गः प्रचोदयात्
हृदयं कामदेवाय ङेंतं सर्वजनप्रियम्
ज्वल ज्वल प्रज्वलेति प्रोच्य सर्वजनस्य च
प्रोक्तो मदनमन्त्रो ऽष्टचत्वारिंशद्भिरक्षरैः
पीठ प्राग्वत्समभ्यर्च्य मूर्ति संकल्प्य मूलतः