षडक्षरो ऽयं संप्रोक्तः सर्वसिद्धिकरो मनुः
गोविन्दवह्निचन्द्राढ्यो मनुः श्रीबीजमीरितम्
शालग्रामे मणौ यन्त्रे मण्डले प्रतिमासु वा
एवं यो भजन्ते कृष्णं स याति परमां गतिम्
कृष्णश्च देवता कामो बीजं शक्तिर्द्विठो बुधैः
मूलेन व्यापकं कृत्वा मनुना पुटितानथ
दशतत्त्वानि विन्यस्य मूलेन व्यापकं चरेत्
शीर्षे ललाटे भ्रूमध्ये नेत्रयोः कर्णयोस्तथा
उदरे नाभिदेशे च लिङ्गे मूलसरोरुहे
न्यसेद्धृदन्तान्मन्त्राणां सृष्टिन्यासो ऽयमीरितः
कट्यां जान्वोर्जङ्घयोश्च गुल्फयोः पादयोस्तथा
वदने चिबुके कण्ठे दोर्मूले विन्यसेत्क्रमात्
पादयोर्गुल्फयोश्चैव जङ्घयोर्जानुनोस्तथा
दोर्मूले कण्ठदेशे च चिबुके वदने नसोः
मूर्ध्नि न्यसेन्मन्त्रवर्णान्संहाराख्यो ऽयमीरितः
मूर्तिपञ्जरनामानं विन्यसेत्पूर्ववत्ततः
द्वारवत्यां सहस्रार्कभास्वरैर्भवनोत्तमैः
ज्वलद्रत्न मयस्तंभद्वारतोरणकुड्यके
पद्मरागस्थलीराजद्रत्नसंघैश्च मध्यतः
रत्नप्रदीपावलिभिः प्रदीपितदिगन्तरे
समासीनो ऽच्युतो ध्येयो द्रुतहाटकसन्निभः
सर्वाङ्गसुंदरः सौम्यः सर्वाभरणभूषितः
अनाहतोच्छलद्रत्नधारौघकलशं स्पृशन्
रुक्मिणीसत्यभामे ऽस्य मूर्ध्नि रत्नौघधारया
नाग्नजिती सुनन्दा च दिशन्त्यौ कलशौ तयोः
रत्ननद्याः समुद्धृत्य रत्नपूर्णौं घटौ तयोः
बहिः षोडश साहस्रसंख्याकाः परितः प्रियाः
तद्बहिश्चाष्टनिधायः पूरयन्तो धनैर्धराम्
एवं ध्यात्वा जपेल्लक्षपञ्चकं तद्दशांशतः
विलिप्य गन्धपङ्केन लिखेदष्टदलांबुजम्