द्विगुणात्साध्यसिद्धस्तु साध्यसाध्यो विलंबतः
सुसिद्धसिद्धोर्द्धतया तत्साध्यो द्विगुणाज्जपात्
अरिसिद्धस्तु पुत्रध्नो ऽरिशाध्यः कन्यकापहः
अन्ये ऽप्यत्र प्रकारा हि संति वै बहवों मुने
एवं संशोध्य मन्त्रं तु शुद्धे काले स्थले तथा
नित्यकृत्यं विधायाथ प्रणम्यगुरुपादुकाम्
संपूज्य वस्त्रालङ्कारगोहिरण्यधरादिभिः
गुरुः शिष्येण सहितः शुचिर्यागगृहं विशेत्
दिव्यानुत्सारयेद्विघ्नान्नभस्थानर्च्य वारिणा
वर्णकैः सर्वतोभद्रे यथोक्तपरिकल्पिते
अस्त्रप्रक्षालितं कुंभं यथाशक्ति विनिर्मितम्
विलोममातृकामूलमुञ्चरन् शुद्धवारिणा
धूम्रार्चिरूष्मा ज्वलिनी ज्वालिनी विस्फुलिङ्गिनी
वह्नेर्दश कलाः प्रोक्ताः प्रोच्यन्ते ऽथ रवेः कलाः
सुषुम्णा भोगदा विश्वा बोधिनी धारिणी क्षमा
पूषा तुष्टिश्च पुष्टिश्च रतिश्च धृतिसंज्ञिकाः
पूर्णापूर्णामृता चेति प्रोक्ताश्चन्द्रमसः कलाः
नवरत्नानि निक्षिप्य विन्यसेत्पञ्चपल्लवान्
मुक्तामाणिक्यवैडूर्यगोमेदान्वज्रविद्रुमौ
एवं रत्नानि निक्षिप्य तत्रावाह्येष्टदेवताम्
वेद्यां संवेश्य संप्रोक्ष्य प्रोक्षणीस्थेन वारिणा
न्यासजालेन संशोध्य मूर्ध्नि विन्यस्य पल्लवान्
अभिषिञ्चेत्प्रियं शिष्यं जपन्मूलमनुं हृदि
गुरुं प्रणम्य विधिवत्संविशेत्पुरतः शुचिः
जपेदष्टोत्तरशतं देयमन्त्रं विधानतः
ततः सचन्दनं हस्तं दत्वा शिष्यस्य मस्तके
संप्राप्तविद्यः शिष्यो ऽपि निपतेद्गुरुपादयोः
कीर्तिश्रीकान्तिपुत्रायुर्बलारोग्य सदास्तु ते
दद्याञ्च दक्षिणां तस्मै वित्तशाठ्यविवर्जितः
देहपुत्रकलत्रैश्च गुरुसेवापरो भवेत्