समाराध्यः स एवात्र सर्वैः सर्वार्थकाङ्क्षिभिः
के देवाः पूजनीयाश्च विष्णुपादपरायणैः
दीक्षणं प्रातराद्यं च कृत्यं स्याद्यत्तदुच्यताम्
प्रीयेत परमात्मा वै तद्ब्रूत मम मानदाः
सनत्कुमारो भगवानुवाचार्कसमद्युतिः
यज्ज्ञात्वामलया भक्त्या साधयेद्विष्णुमव्ययम्
भोगमोक्षक्रियाचर्याह्वया पादाः प्रकीर्तिताः
पतिस्तत्र शिवोह्येको जीवास्तु पशवः स्मृताः
तावत्पशुत्वमेतेषां द्वैतवत्पश्य नारद
पशवस्त्रिविधाश्चापि विज्ञाताः कलसंज्ञिकाः
तत्राद्यो मलसंयुक्तो मलकर्मयुतः परः
आद्यस्तु द्विविधस्तत्र समासकलुषस्तथा
पक्वापक्वमलेनैव द्विविधः परिकीर्तितः
कलादितत्त्वनियतः सकलः पर्यटत्ययम्
पाशाः पञ्च तथा तत्र प्रथमौ मलकर्मजौ
एको ऽप्यनेकशक्तिर्दृक्क्रियाच्छादनकोमलः
धर्माधर्मात्मकं कर्म विचित्रफलभोगदम्
इत्येतौ प्रथमौ चाथ मायेयाद्यान् शृणुद्विज
पतिर्जयति सर्वेषामेको बीजं विभुः परम्
वर्वर्ति दृक्क्रियारूपं तत्तेजः शांभवं परम्
तच्छक्तिमाद्यामेकान्तां विद्रूपाख्यां वदन्ति हि
अशेषतत्त्वजातस्य कारणं विभुरव्ययम्
कृत्यं कुर्वन्ति तेनेदं सर्वानुग्राहकं मुने
आद्योन्मेषो ऽस्य नादात्मा शान्त्यादिभुवनात्मकः
ततो ज्ञानक्रियाशक्त्योस्तथोत्कर्षापकर्षयोः
दृक्शक्तिर्यत्र न्यग्भूता क्रियाशक्तिर्विशिष्यते
यत्र क्रिया हि न्यग्भूता ज्ञानाख्योद्रेकमश्नुते
नादो बिन्दुश्च सकलः सदाख्यं तत्त्वमाश्रितौ
इमानि चैव तत्त्वानि शुद्धाध्वेति प्रकीर्तितम्
पञ्चानां कालराहित्याक्रमो नास्तीति निश्चितम्