अकुतश्चित्कुतश्चिद्वा चित्ततः सात्त्विको गुणः
लिङ्गानि रजसस्तानि दृश्यन्ते हेत्वहेतुतः
कथञ्चिदपि वर्तन्ते विविधास्तामसा गुणाः
न लिप्यते कर्मपलैरनिष्टैः पत्रं विषस्येव जलेन सिक्तम्
यदा ह्यसौ दुःखसौख्ये जहाति मुक्तस्तदाग्र्यां गतिमेत्यलिङ्गः
क्षीणे च पुण्ये विगते च पापे तनोर्निमित्ते च फले विनष्टे
यथोर्णनाभिः परिवर्तमानस्तन्तुक्षये तिष्टति यात्यमानः
यथा रुरुः शृङ्गमथो पुराणं हित्वा त्वचं वाप्युरगो यथा च
मत्स्यं यथा वाप्युदके पतन्तमुत्सृज्य पक्षी निपतत्सशक्तः
तथा ह्यसौ दुःखसौख्ये विहाय मुक्तः परार्द्ध्या गतिमेत्यलिङ्गः
निखिलमभिसमीक्ष्य निश्चितार्थः परमसुखी विजहार वीतशोकः
न खलु मम हि दह्यते ऽत्र किञ्चित्स्वयमिदमाह किल स्म भूमिपालः
उपद्रवाननुभघवते ह्यदुः खितः प्रमुच्यते कपिलमिवैत्य मैथिलः
पुनः पप्रच्छ तं प्रीत्या सनन्दनमुदारधीः
प्रब्रूहि तन्मुने मह्यं प्रपन्नाय दयानिधे
गर्बे जन्मजराद्येषुस्थानेषु प्रभविष्यतः
भेषजं भगवत्प्राप्तिरैका चात्यन्तिकी मता
तत्प्राप्तिहेतुज्ञानं च कर्म चोक्तं महामुने
शब्दब्रह्मागममयं परं ब्रह्मविवेकजम्
तदेतच्छ्रूयतामत्र सुबोधं गदतो मम
शब्दब्रह्मणि निष्णातः परं ब्रह्माधिगच्छति
परमा त्वक्षरप्राप्तिरृग्वेदादिमया परा
अनिर्देश्यमरूपं च पाणिपादादिसंयुतम्
व्याप्यं व्याप्तं यतः सर्वं तं वै पश्यन्ति सूरयः
श्रुतिवाक्योदितं सूक्ष्मं तद्विष्णोः परमं पदम्
वाचको भगवच्छब्दस्तस्योद्दिष्टो ऽक्षयात्मनः
ज्ञायते येन तज्ज्ञानं परमन्यत्रयीमयम्
पूजायां भगवच्छब्दः क्रियते ह्यौपचारिकः
भगवन्भगवच्छब्दः सर्वकारणकारणे तेनागमपिता स्रष्टा गकारो ऽयं तथा मुने
ज्ञानवैराग्ययोश्चैव षण्णां भग इतीरणा