उद्धरत्येव संसारान्मन्त्रेणानेन पूजिता
इति मन्त्रेण यो मर्त्यो दिने तस्मिन्दिवानिशम्
उद्दरेद्दश पूर्वाणि पराणि च भवार्णवात्
गङ्गाग्रे तद्दिने जप्यं विष्णुपूजां प्रवर्तयेत्
नमो ऽस्तु विष्णुरूपिण्यै गङ्गायै ते नमो नमः
सर्वस्य सर्वव्याधीनां भिषक्श्रेष्ठे नमो ऽस्तु ते
संसारविषनाशिन्यै जीवनायै नमोनमः
शान्त्यै संतापहारिण्यै नमस्ते सर्वमूर्तये
भुक्तिमुक्तिप्रदायिन्यै भोगवत्यै नमोनमः
नमस्त्रैलोक्यमूर्तायै त्रिदशायै नमोनमः
त्रिदशासनसंस्थायै तेजोवत्यै नमो ऽस्तु ते
नमस्ते विश्वमित्रायै रेवत्यै ते नमोनमः
नमस्ते विश्वमुख्यायै नन्दिन्यै ते नमोनमः
परावरगताद्यैयै तारायै ते नमोनमः
शान्तायै ते प्रतिष्ठायै वरदायै नमोनमः
ब्रह्मगायै ब्रह्मदायै दुरितघ्न्यै नमोनमः
विलुषायै दुर्गहन्त्र्यै दक्षायै ते नमोनमः
गङ्गा ममाग्रतो भूयाद्गङ्गा मे पार्श्वयोस्तथा
आदौ त्वमन्ते मध्ये च सर्वा त्वं गाङ्गते शिवे
गङ्गे त्वं परमात्मा च शिवस्तुभ्यं नमोनमः
शृणोति श्रद्धया वापि कायवाचिकसंभवैः
रोगी प्रमुच्यते रोगान्मुच्येतापन्न आपदः
सर्वान्कामानवाप्नोति प्रेत्य ब्रह्मणि लीयते
नाग्निचौरभयं तत्र पापेभ्यो ऽपि भयं नहि
जपंस्तु दशकृत्वश्च दरिद्रो वापि चाक्षमः
पूर्वोक्तेन विधानेन फलं यत्परिकीर्तितम्
विधिर्यो विहितः सम्यक्सो ऽपि गङ्गाप्रपूजने
उमा यथा तथा गङ्गा चात्र भेदो न विद्यते
लक्ष्मीगौर्यतरं यश्च प्रब्रूते मूढधीस्तु सः
धन्या देहं विमुञ्चन्ति हृदयस्थे जनार्दने