तीर्थेषु स्वगृहे वापि गङ्गातीरे विशेषतः
प्रदक्षिणीकृत्य विप्रं दक्षिणाभिः प्रतोष्य च
ततः संपूजयेद्गङ्गां विधिना सुसमाहितः
शालितन्दुलप्रस्थेन द्विप्रस्थपयसा तथा
प्रत्येकं पलमात्रं च भक्तिभावेन संयुतः
तथा गुञ्जार्द्धमात्रं च सुवर्णं रूप्यमेव च
बिल्वपत्राणि दूर्वाश्च रोचना सितचन्दनम्
यथाशक्ति महाभक्त्या गङ्गायां चैव निक्षिपेत्
ओङ्गङ्गायै नारायण्यै शिवायै च नमोनमः
पौर्णमास्यामपायां वा कार्यं प्रातः समाहितैः
हविष्याशी मिताहारो ब्रह्मचर्यसमन्वितः
संवत्सरान्ते तस्येषा गङ्गा दिव्यवपुर्द्धरा
प्रत्यक्षरूपा पुरतस्तिष्टत्येव वरप्रदा
दृष्ट्वा स्व चक्षुषा मर्त्यः कृतकृत्यो भवेच्छुभे
निष्कामस्तु लभेन्मोक्षं विप्रस्तेनैव जन्मना
गङ्गार्चनं मुक्तिकरं व्रतं त्त सांवत्सरं श्रीपतितुष्टिदं हि
पुनः पप्रच्छ राजेन्द्रं तं विप्रं स्वपुरोहितम्
अधुना श्रोतुमिच्छामि गङ्गाव्रतमनुत्तमम्
किं फलं वद सर्वज्ञ त्वामहं शरणं गता
पत्या विरहिता चाहं पुत्रहीना विदांवर
देवताराधनं ब्रूहि यच्छ्रुत्वा मुच्यते ह्यघात्
सभाज्य मोहिनीं भूप प्राह वेदविदां वरः
साधु पृष्टं त्वया देवि लोकानां हितकाम्यया
वृषध्वजेन कथितं शिवेन दयया पुरा
देवैस्तु भुक्तं पूर्वाह्णे मध्याह्ने ऋषिभिस्तथा
सर्वा वेला अतिक्रम्य नक्तभोजनमुत्तमम्
अयाचिताद्वारं नक्तं तस्मान्नक्तं समाचरेत्
अग्निकार्य्यमधःशय्यां नक्ताशी षट् समाचरेत्
शिवायतनपार्श्वे तु कृशरं घृतसंयुतम्
काष्ठमौनेन भुञ्जानो जिह्वालौल्यं विवर्जयेत्