व्रजद्वराहनिकरं चमरीपुच्छवीचितम्
प्रवर्द्धितमहावृक्षं मुनिकन्याभिरादरात्
मालतीयूथिकाकुन्दचम्पकाशअवत्थभूषितम्
वेदशास्त्रमहाघोषमाश्रमं प्राविशद्भुगोः
तेजसा सूर्यसदृशं भृगुं तत्र ददर्श सः
आतिथ्यं भृगुरप्यस्य चक्रे सन्मानपूर्वकम्
उवाच प्राञ्जलिर्भूत्वा विनयान्मुनिपुङ्गवम्
पृच्छामि भवभीतो ऽहं नृणामुद्धारकारणम्
तन्ममाख्याहि सर्वज्ञ अनुग्राह्यो ऽस्मि ते यति
अन्यथा स्वकुलं सर्वं कथमुद्धर्त्तुमर्हसि
उद्धर्त्तकामस्तं विद्यान्नररुपधरं हरिम्
तत्प्रवक्ष्यामि राजेन्द्र शृणुष्व सुसमाहितः
सर्वभूतहितो नित्यं मानृतं वद वै क्वचित्
कुरु पुण्यमहोरात्रं स्मर विष्णुं सनातनम्
द्वादशाष्टाक्षरं मन्त्रं जय श्रेयो भविष्यति
अनृतं कीदृशं प्रोक्तं दुर्जनाश्चापि कीदृशाः
स्मर्तव्यश्च कथं विष्णुस्तस्य पूजा च कीदृशी
को वा द्वादशवर्णश्च मुने तत्त्वार्थकोविद
साधु साधुमहाप्राज्ञ तव बुद्धिरनुत्तमा
यथार्थकथनं यत्तत्सत्यमाहुर्विपश्चितः
देशकालादि विज्ञाय स्वयमस्याविरोधतः
सर्वेषामेव जन्तूनामक्लेषजननं हि तत्
कर्मकार्यसहायत्वमकार्यपरिपन्थिता
इच्छानुवृत्तकथनं धर्माधर्मविवेकिनः
ये लोके द्वेषिणो मूर्खाः कुमार्गरतबुद्धयः
धर्माधर्मविवेकेन वेदमार्गानुसारिणः
हरि भक्तिकरं यत्तत्सद्भिश्च परिरञ्चितम्
सर्वं जगदिदं विष्णुर्वष्णुः सर्वस्य कारणम्
सर्वदेवमयो विष्णुर्विधिना पूजयामि तम्
सर्वभूतमयो विष्णुः परिपूर्णः सनातनः