अतस्त्वां पूजयिष्यामि भूते भूतिप्रदा भव"
परिक्रम्योत्सवः कार्य्यो गीतवादित्रनिःस्वनैः
ततस्तां प्रदहॄन्त्येवं काष्ठाद्यैर्गीतमङ्गलैः
इति जानीहि विप्रेन्द्र लोके स्थितिरनेकधा
पृथक्छृणुष्व मे विप्र पितॄणामतिवल्लभम्
पार्वणेन विधानेन श्राद्धं वित्तानुसारतः
सर्वमासेष्वमायां वै बहुपुण्यप्रदं यतः
विधानं ज्येष्ठपूर्णावदिहापि परिकीर्तितम्
पितृश्राद्धं दानहोमसुरार्चानन्त्यश्नुते
विरिञ्चिमनुनामन्त्र्य हुंफट् छिन्नान्कुशान् द्विज
इषामायां विशेषण पितॄणां श्राद्धतर्पणम्
ऊर्ज्जामायां दीपदानं देवा गारगृहेषु च
समर्चनं तथा लक्ष्म्याः स्वर्णरौप्ये कृताकृते
गवां पूजात्र विहिता शृङ्गाद्यङ्गानुरञ्जनैः
मार्गे ऽपि पितृपूजा स्याच्छ्रद्धैर्ब्राह्मणभोजनैः
पौषे माघे च विप्रेन्द्र पितृश्राद्धं फलाधिकम्
फआल्गुने केवलं श्राद्धं द्विजानां भोजनं तथा
इत्थं संक्षेपतः प्रोक्तं तिथिकृत्यं मुने तव
सर्वत्रापि विशेषो ऽस्ति स पुराणान्तरे स्थितः
संपूजिताः शास्त्रविदां वरिष्ठाः कृताह्निका जग्मुरुमेशलोकम्
सुरासुरेन्द्रैरभिवन्द्यमुग्रं नत्वाज्ञया तस्य निषेदुरुर्व्याम्
जग्मुस्ततो ज्ञानघनस्वरूपा नत्वा पुरारिं स्वपितुर्निकाशम्
लब्ध्वाशिषो ऽद्यापि चरन्ति शश्वल्लोकेषु तीर्थानि च तीर्थभूताः
दध्युश्चिरं विष्णुपदाब्जमव्ययं ध्यायन्ति यद्यतयो वीतरागाः
लब्ध्वा ज्ञानं सविज्ञानं भृशं प्रीतमना ह्यभूत्
प्रणम्य सत्कृतः पित्रा ब्रह्मणा निषसाद च
वर्णयामास तत्त्वेन सो ऽपि श्रुत्वा मुमोद च
आजगाम च कैलासं मुनिसिद्धनिषेवितम्
मन्दारैः पारिजातैश्च चंपकाशोकवञ्जुलैः
वातोद्धूतशिखैः पान्थानाह्वयद्भिरिवावृतम्