लक्ष्मीकल्पानुचरितं यत्र कूर्मवपुर्हरिः
इन्द्रद्युम्नप्रसंगेन प्राहर्षिभ्यो दयान्वितः
यत्र ब्राह्माः पुरा प्रोक्ता धर्मा नानाविधा मुने
तत्र पूर्वविभागे तु पुराणोपक्रमः पुरा
वर्णाश्रमाचारकथा जगदुत्पत्तिकीर्तनम्
ततः संक्षेपतः सर्गः शाङ्करं चरितं तथा
भृगुवंशसमाख्यानं ततः स्वायम्भुवस्य च
दक्षसृष्टिकथा पश्चात्कश्यपान्वयकीर्तनम्
मार्तण्डकृष्णसंवादो व्यासपाण्डवसंकथा
वाराणस्याश्च माहात्म्यं प्रयागस्य ततः परम्
उत्तरे ऽस्या विभागे तु पुरा गीतैश्वरी ततः
नानाविधानां तीर्थानां माहात्म्यं च पृथक् ततः
अतः परं भागवतीसंहितार्थ निरूपणम्
पादऽस्याः प्रथमे प्रोक्ता ब्राह्मणानां व्यवस्थितिः
द्वितीये क्षत्त्रियाणां तु वृत्तिः सम्यक्प्रकीर्तिता
तृतीये वैश्यजातीनां वृत्तिरुक्ता चतुर्विधा
चतुर्थे ऽस्यास्तथा पादे शूद्रवृत्तिरुदाहृता
पञ्चमे ऽस्यास्ततः पादे वृत्तिः संकरजोदिता
इत्येषा पञ्चपद्युक्ता द्वितीया संहिता मुने
षोढा षट्कर्मसिर्द्धि बोधयन्ती च कामिनाम्
चतुष्पदी द्विजातीनां साक्षाद्ब्रह्मस्वरूरिणी
ताः क्रमात्षट्चतुर्द्वीषुसाहस्राः परिकीर्तिताः
पठतां शृण्वतां नॄणां सर्वोत्कृष्टगतिप्रदम्
ब्राह्मणाया यने दद्यात्स याति परमां गतिम्
यत्रोक्तं सप्तकल्पानां वृत्तं संक्षिप्य भूतले
उपक्रम्य तदुद्दिष्टं चतुर्द्दशसहस्रकम्
ब्रह्मदेवासुरोत्पत्तिर्मारुतोत्पत्तिरेव च
मन्वन्तरसमुद्देशो वैश्यराज्याभिवर्णनम्
पितृवंशानुकथनं श्रद्धाकालस्तथैव च
कीर्तनं सोमवंशस्य ययातिचरितं तथा