तत्सर्वं लभते वत्स पुराणस्यास्य कीर्तनात्
महत्पुण्यप्रदं नॄणां शृण्वतां पठतां मुदा
तथेदं पञ्चभिः खण्डैरुदितं पापनाशनम्
नानाख्यानेतिहासाद्यैर्यत्रोक्तो धर्मविस्तरः
ब्रह्मयज्ञविधानं च वेदपाठादिलक्षणम्
विवाहः शैलजायाश्चतारकाख्यानकं महत्
कालकेयादिदैत्यानां वधो यत्र पृथक्पृथक्
तत्सृष्टिखण्डमुद्दिष्टं व्यासेन सुमहात्मना
सुव्रतस्य कथा पश्चाद्वृत्रस्य च वधस्तथा
सुकलाख्यानकं चैव धर्माख्यानं ततः परम्
ययातिचरितं चैव गुरुतीर्थनिरूपणम्
कथा ह्यशोकसुंदर्याहुण्डदैत्यवधान्विता
कुञ्जलस्य च संवादश्च्यवनेन महात्मना
सूतशौनकसंवादं भूमिखण्डमिदं स्मृतम्
सभूमिलोकसंस्थानं तीर्थाख्यानं ततः परम्
कुरुक्षेत्रादितीर्थानां कथा पुण्या प्रकीर्तिता
गयायाश्चैव माहात्म्यं प्रयागस्य च पुण्यकम्
व्यासजमिनिसंवादः पुण्यकर्मकथान्वितः
ऊर्ज्जपञ्चाहमाहाम्यं स्तोत्रं सर्वापराधनुत्
रामाश्वमेधं प्रथमं रामराज्याभिषेचनम्
अश्वमेधोपदेशश्च हयचर्या ततः परम्
वृन्दावनस्य माहात्म्यं सर्वपापप्रणाशनम्
माधवस्नानमाहात्म्यं स्नानदानार्चने फलम्
संवादो राजदूतानां कृष्णस्तोत्रनिरूपणम्
भस्ममाहात्म्यमतुलं शिवमाहात्म्यमुत्तमम्
गौतमाख्यानकं चैव शिवगीता ततः स्मृता
पातालखण्डमेतद्धि शृण्वतां पठतां सदा
पर्वताख्यानकं पूर्वं गौर्थै प्रोक्तं शिवेन वै
सगरस्य कथा पुण्या ततः परमुदीरितम्
अन्नादि दानमाहात्म्यं तन्महाद्वादशीव्रतम्