अयुतद्वयसंयुक्तगुणलक्षं जपेन्मनुम्
पञ्चाक्षरोदिते पीठे तद्विधानेन पूजयेत्
नित्यं सहस्रमष्टार्द्धं परां विन्दति वाक्छ्रियम्
दक्षिणामूर्तिंसंध्यानाच्छास्त्रव्याख्यानकृद्भवेत्
ङेयुतं दक्षिणामूर्तिं मह्यंमेधामुदीरयेत्
मुनिश्चतुर्मुखश्छन्दो गायत्री देवतोदिता
पदैर्मन्त्रभवैर्वापिध्यानाद्यं पूर्ववन्मतम्
द्वितीयं वह्निबीजस्था दीर्घा शान्तीन्दुभूषिता
नीलकण्ठात्मकः प्रोक्तो विषद्वयहरः परः
कपर्द्दिने पदयुगं शिरोमन्त्र उदाहृतः
कालकूटपदस्यान्ते विषभक्षणङेयुतम्
स्वाहान्तमस्त्रमेतानि पञ्चागानि मनोर्विदुः
बालार्कायुतवर्चस्कं जटाजूटेन्दुशोभितम्
खट्वाङ्गं दधतं दोर्भिस्त्रिनेत्रं चिन्तयेद्धरम्
हविषा जुहुयात्सम्यक्संस्कृते हव्यवाहने
मृत्युं जयविधानेन विषद्वयविनाशनम्
चिन्तामणिरिति ख्यातं बीजं सर्वसमृद्धिदम्
अर्द्धनारीश्वरः प्रोक्तो देवता जगतां पतिः
त्रिनेत्रं नीलमणिभं शूलपाशं कपालकम्
बालेन्दुबद्धमुकुटमर्द्धनारीश्वरं स्मरेत्
तिलैर्हुनेद्यजेत्पीठे शैवेङ्गावरणैः सह
प्रासादाद्यं जपेन्मन्त्रमयुतं रोगशान्तये
चन्द्रबिंबस्थितं मूर्ध्नि ध्यातं क्ष्वेडगदापहम्
रेफआदिव्यञ्जनोल्लासिषट्कोणाभिवृतं बहिः
पीडिताङ्गे स्मृतं तत्तत्पीडां शमयति ध्रुवम्
तारो नमो भूतपदं ततो ऽधिपतये ध्रुवम्
विहरद्वितयं पश्चान्नरीनृत्ययुगं पृथक्
घण्टाकपालमालादिधरायेति पदं पुनः
शशाङ्ककृतशब्दान्ते शेखराय ततः परम्
बलयुग्मं चलायुग्ममनिवर्तकपालिने