षड्भिर्वर्णैः षडङ्गानि कुर्यान्मन्त्रेण देशिकः
तर्जनीमध्ययोरन्त्यानामिकाङ्गुष्ठके पुनः
वक्त्रहृत्पादगुह्येषु निजमूर्द्धनि ताः पुनः
मन्त्राङ्गानिन्यसेत्पश्चाज्जातियुक्तानि षट् क्रमात्
हृदि वक्त्रेंऽसयोरूर्वोः कण्ठे नाभौ द्विपार्श्वयोः
दोःपत्संधिषु साग्रेषु विन्यसेत्तदनन्तरम्
हृदि वक्त्रांबुजे टङ्कमृगा भयवरेष्वथ
मूलमन्त्रस्य षड वर्णान्यथावद्देशिकोत्तमः
पश्चादनेन मन्त्रेण कुर्वीत व्यापकं सुधीः
चतुर्मूर्तिवपुश्छायाभासिताङ्गाय शंभवे
ध्यायेन्नित्यं महेशानं रौप्यपर्वतसन्निभम्
परश्वधवराभीतिमृगहस्तं शुभाननम्
व्याघ्रकृतिं वसानं च विश्वाद्यं विश्वरूपकम्
तत्त्वलक्षं जपेन्मन्त्रं दीक्षितः शैववर्त्मना
ततः सिद्धो भवेन्मन्त्रः साधकाभीष्टसिद्धिदः
वामा ज्येष्ठा तथा रौद्री काली कलपदादिका
बलप्रमथनी पश्चात्सर्वभूतदमन्यथ
नमो भगवते पश्चात्सकलादि वदेत्ततः
योगपीठात्मने भूयो नमस्तारादिको मनुः
मूर्तिं मूलेन संकल्प्य तत्रावाह्य यजेच्छिवम्
शुद्धस्फटिकसंकाशं दिक्षु तत्पुरुषादिका
चतुर्वक्त्रसमायुक्ता यथावत्ताः प्रपूजयेत्
अङ्गानि केसरस्थानि विघ्नेशान्पन्नगान्यजेत्
एकनेत्रमेकरुद्रं त्रिमूर्तिं तदनन्तरम्
रक्तपीतसितारक्तकृष्णरक्ताञ्जनासितान्
त्रिनेत्राञ्छूलवज्रास्त्रचापहस्तान्मनोरमान्
ततो नन्दिमहाकालौ गणेशं वृषभं पुनः
स्वर्णतोयारुणश्याममुक्तेन्दुसितपाटलान्
इत्थं संपूजयेद्देवं सहस्रं नित्यशो जपेत्
द्विसहस्रं जपन् रोगान्मुच्यते नात्र संशयः