पटले तु प्रयोगांश्च वक्ष्याम्यग्रे सविस्तरम्
कामेश्वरीति तां सर्वकामदां शृणु नारद
शून्यमग्नियुतं पश्चाद्रयोव्याप्तेन संयुतम्
नभोगोत्रा पुनश्चैषां दाहेन समयोजिता
एषा कामेश्वरी नित्या कामदैकादशाक्षरी
एकेन हृदयं शीर्षं तावताथो द्वयं द्वयात्
दृक्श्रोत्रनासाद्वितये जिह्वाहृन्नाभिगुह्यके
न्यसेद्विद्याक्षराण्येषु स्थानेषु तदनन्तरम्
अथ ध्यानं प्रवक्ष्यामि नित्यपूजासु चोदितम्
बालार्ककोटिसंकाशां माणिक्यमुकुटोज्ज्वलाम्
मण्डितां रक्तवसनां रत्नाभरणशोभिताम्
पञ्चाष्टषोडशद्वन्द्वषट्कोणचतुरस्रगाम्
पाशाङ्कुशौ च पुण्ड्रेक्षुचापं पुष्पशिलीमुखम्
ततः प्रयोगान्कुर्वीत सिद्धे मत्रे तु साधकः
कामेश्वर्यादिरादिः स्याद्रसश्चापस्थिरारसः
स्थिराशून्ये ऽग्निसंयुक्ते रसः स्यात्तदनन्तरम्
नभश्च मरुता युक्तं रसवर्णसमन्वितम्
अंबहंसचरो ऽथिक्तो रसो ऽथ स्यात्स्थिरा पुनः
रसः स्थिरा ततो व्याप्तं भूयुतं शून्यमग्नियुक्
रयः शून्यं चाग्नियुतं हृदाहंसाच्च तत्परम्
सचरः स्याज्जवीपूर्वविद्या तर्तीयतः क्रमात्
हृदंबुयुक् क्ष्मया दाहः सचरः स्याज्जवी च हृत्
स्थिरा तु मरुता युक्ता शून्यं साग्निनभश्चरौ
दाहो गोत्राचरयुता तथा दाहस्तथा रयः
रसः स्थिरा ततः प्राणो रसाग्निसहितो भवेत्
शून्ययुग्मं च गोत्रा स्याद्वाहयुक्तांबुना चरः
गोत्रादाहमरुद्युक्ता त्वंबुन्यासमतो भवेत्
ग्रासो धरायुतः पश्चाद्रसः शक्त्या समन्वितः
दाहोनांबु च हृत्पश्चाद्रयेंऽबुमरुदन्वितः
वियदंबुयुतं दाहस्त्वग्नियुक्सयुतः शुचिः