स्तंभनं माहिषैर्मांसैः पङ्कजैः सघृतैरपि
उन्मत्तकाष्ठदीप्ते ऽग्नौ तत्फलं वायसच्छदैः
विजयं लभते मन्त्री ध्यायन्देवीं जपन्मनुम्
रक्तां वश्ये मृतौ धूम्रां स्तंभने कनकप्रभाम्
गोपनीयः प्रयोगो ऽय प्रोच्यते सर्वसिद्धिदः
स्नात्त्वा रक्ताम्बरधरो रक्तमाल्यानुलेपनः
सुन्दरीं यौवनाक्रान्तां नरपञ्चकगामिनीम्
विवस्त्रां पूजयित्वैनामयुतं प्रजपेन्मनुम्
भोजयेद्विविधैरन्नैर्ब्राह्मणान्भोजनादिना
नारीमायुः सुखं धर्ममिष्टं च समवाप्नुयात्
मनोरथेषु चान्येषु गच्छेत्तां प्रजपन्मनुम्
षण्मासाभ्यन्तरेमन्त्री कवित्वेन जयेत्कविम्
मायां तारपुटां मन्त्री जपेदष्टोत्तरं शतम्
उदिता छिन्नमस्तेयं कलौ शीघ्रमभीष्टदा
ज्ञानामृतारुणा श्वेताक्रोधिनीन्दुसमन्विता
वाग्भवं कामराजाख्यं शक्तिबीजाह्वयं तथा
ऋषिः स्याद्दक्षिणामूर्तिश्छन्दः पङ्क्तिरुदीरिता
नाभेराचरणं न्यस्य वाग्भवं मन्त्रवित्पुनः
शिरसो हृत्प्रदेशान्तं तार्तीयं विन्यसेत्ततः
मूलाधारे हृदि न्यस्य भूयो बीजत्रयं क्रमात्
बालोदितप्रकारेण मूर्तिन्यासमथाचरेत्
न्यसेद्वक्त्रे तत्पुरुषं मकरध्वजमात्मवित्
गुह्यदेशे प्रविन्यस्येद्वामदेवादिमन्मथम्
ऊर्द्ध्वंप्राग्दक्षिणोदीच्यपश्चिमेषु मुखेषु तान्
सद्यादिपञ्चह्रस्वाद्या बीजमेषां प्रकीर्तितम्
पञ्चबाणांस्ततो न्यस्येन्मन्त्री त्रैलोक्यमोहनान्
क्लींवशीकरणीं वक्त्रे गुह्ये बॢं बीजपूर्विकाम्
संमोहनीं क्रमादेवं बाणन्यासो ऽयमीरितः
नाभ्यधिष्ठानयोः पञ्च ताराद्याः सुभगादिकाः
भगसर्पिण्यथ परा भगमालिन्यनन्तरम्