भूगृहस्य चतुर्दिक्षु पूर्वादिषु यजेत्क्रमात्
इन्द्रादींश्च ततो बाह्ये निजायुधसमन्वितान्
पीतवस्त्रपदासीनः पीतमाल्यानुलेपनः
पीतां ध्यायन्भगवतीं पयोमध्ये ऽयुतं जपेत्
मधुरत्रितयाक्तैः स्यादाकर्षो लवर्णैर्ध्रुवम्
ताललोणहरिद्राभिर्द्विषां संस्तंभनं भवेत्
श्मशाने पावके हुत्वा नाशयेदचिरादरीन्
गृहधूमं चितावह्नौ हुत्वा प्रोच्चाटयेद्रिपून्
जुहोति सो ऽखिलान् रोगान् शमयेद्दर्शनादपि
ब्रह्मचर्यरतो लक्षं जपेदखिलसिद्धये
त्रिशतं मन्त्रितं पीतं हन्याद्विषपराभवम्
अलक्तरञ्जिते लक्षं मन्त्रयेन्मनुनामुना
पारदं च शिलां तालं पिष्टं मधुसमन्वितम्
अदृश्यः स्यान्नृणामेष आश्चर्य्यं दृश्यतामिदम्
हरितालनिशाचूर्णैरुन्मत्तुरससंयुतैः
तद्यन्त्रं स्थापितप्राणं पीतसूत्रेण वेष्टयेत्
रचयेदृषभं रम्यं यन्त्रं तन्मध्यतः क्षिपेत्
स्तंभयेद्विद्विषां वाचं गतिं कार्यपरंपराम्
अङ्गारेण चितास्थेन तत्र यन्त्रं समालिखेत्
प्रेतवस्त्रे लिखेद्यन्त्रं अङ्गारेणैव तत्पुनः
पूजितं पीतपुष्पैस्तद्वाचं संस्तंभयेद्द्विषाम्
मार्जितं तद्द्विषां पात्रैर्दिव्यस्तम्भनकृद्भवेत्
क्षिप्तं जले दिव्यकृतं जलस्तंभनकारकम्
शत्रूणां गतिबुद्ध्यादेः स्तंभनो नात्र संशयः
दुर्गायाश्चाभिधास्यामि सर्वलोकोपकारकान्
वज्राद्यं क्षुधिता सूक्ष्मा मृता स्वाग्नीन्दुसंयुता
भैरवो ऽस्य मुनिः सम्राट् छन्दो मन्त्रस्य देवता
आं खड्गाय हृदाख्यातमीं खड्गाय शिरः स्मृतम्
औमङ्कुशाय नेत्रं स्याद्विसर्गो वसुरक्षयुक्
स्वाहान्ताश्चैवमङ्गानि कृत्वा ध्यायेद्थांबिकाम्