कूर्मपुराणम्

धर्मज्ञानाधिगम्याय निष्कलाय नमो नमः

परावराणां प्रभवे वेदवेद्याय ते नमः

नमो नमो नमस्तुभ्यं मायिने वेधसे नमः

वामनाय नमस्तुभ्यं हृषीकेशाय ते नमः

स्वर्गापवर्गदात्रे च नमो ऽप्रतिहतात्मने

देवानां पतये तुभ्यं देवार्तिशमनाय ते

अस्माभिर्विदितं ज्ञानं यज्ज्ञात्वामृतमश्नुते

सर्गश्च प्रतिसर्गश्च ब्रह्माण्यस्यास्य विस्तरः

त्रातुमर्हस्यनन्तात्मंस्त्वमेव शरणं गतिः

कौर्मं पुराणमखिलं यज्जगाद गदाधरः

मोहायाशेषभूतानां वासुदेवेन योजनम्

धर्मार्थकाममोक्षाणां यथावल्लक्षणं शुभम्

एकत्वं च पृथक्त्वं च विशेषश्चोपवर्णितः

वर्णाश्रमाणां कथितं यथावदिह लक्षणम्

हिरण्यगर्भसर्गश्च कीर्तितो मुनिपुङ्गवाः

ब्रह्मणः शयनं चाप्सु नामनिर्वचनं तथा

मुख्यादिसर्गकथनं मुनिसर्गस्तथापरः

धर्मस्य च प्रजासर्गस्तामसात् पूर्वमेव तु

पद्मोद्भवत्वं देवस्य मोहस्तस्य च धीमतः

दिव्यदृष्टिप्रदानं च ब्रह्मणः परमेष्ठिनः

प्रसादो गिरिशस्याथ वरदानं तथैव च

वरदानं तथापूर्वमन्तर्धानं पिनाकिनः

अवतारो ऽथ देवस्य ब्रह्मणो नाभिपङ्कजात्

विमोहो ब्रह्मणश्चाथ संज्ञालाभो हरेस्ततः

प्रादुर्भावो महेशस्य ललाटात् कथितस्ततः

भूतिश्च देवदेवस्य वरदानोपदेशकौ

दर्शनं देवदेवस्य नरनारीशरीरता

देव्यास्तु पश्चात् कथितं दक्षपुत्रीत्वमेव च

दर्शनं दिव्यरूपस्य वैश्वरूपस्य दर्शनम्