कूर्मपुराणम्

वानप्रस्थाश्रमं गच्छेत् सदारः साग्निरेव च दृष्ट्वापत्यस्य चापत्यं जर्जरीकृतविग्रहः

गत्वारण्यं नियमवांस्तपः कुर्यात् समाहितः

यताहारो भवेत् तेन पूजयेत् पितृदेवताः

गृहादाहृत्य चाश्नीयादष्टौ ग्रासान् समाहितः

स्वाध्यायं सर्वदा कुर्यान्नियच्छेद् वाचमन्यतः

मुन्यन्नैंर्विविधैर्मेध्यैः शाकमूलफलेन वा

सर्वभूतानुकम्पी स्यात् प्रतिग्रहविवर्जितः

उत्तरायणं च क्रमशो दक्षस्यायनमेव च

पुरोडाशांश्चरूंश्चैव विधिवन्निर्वपेत् पृथक्

शेषं समुपभुञ्जीत लवणं च स्वयं कृतम्

भूस्तृणं शिग्रुकं चैव श्लेष्मातकफलानि च

न ग्रामजातान्यार्तो ऽपि पुष्पाणि च फलानि च

न द्रुह्येत् सर्वभूतानि निर्द्वन्द्वो निर्भयो भवेत्

ब्रह्मचारी भवेन्नित्यं न पत्नीमपि संश्रयेत्

तद् व्रतं तस्य लुप्येत प्रायश्चित्तीयते द्विजः

न हि वेदे ऽधिकारो ऽस्य तद्वंशेप्येवमेव हि

शरण्यः सर्वभूतानां संविभागपरः सदा

एकाग्निरनिकेतः स्यात् प्रोक्षितां भूमिमाश्रयेत्

शिलायां शर्करायां वा शयीत सुसमाहितः

षण्मासनिचयो वा स्यात् समानिचय एव वा

जीर्णानि चैव वासांसि शाकमूलफलानि च

अश्मकुट्टो भवेद् वापि कालपक्वभुगेव वा

चतुर्थकालिको वा स्यात् स्याद्वाप्यष्टमकालिकः

पक्षे पक्षे समश्नीयाद् यवागूं क्वथितां सकृत्

स्वाभाविकैः स्वयं शीर्णैर्वैखानसमते स्थितः

स्थानासनाभ्यां विहरेन्न क्वचिद् धैर्यमुत्सृजेत्

आर्द्रवासास्तु हेमन्ते क्रमशो वर्धयंस्तपः

एकपादेन तिष्ठेत मरीचीन् वा पिबेत् तदा

शीर्णपर्णाशनो वा स्यात् कृच्छ्रैर् वा वर्तयेत् सदा