कूर्मपुराणम्

नोच्छिष्टः संविशेन्नित्यं न नग्नः स्नानमाचरेत्

न दन्तैर्नखरोमाणि छिन्द्यात् सुप्तं न बोधयेत्

नैकः सुप्याच्छून्यगृहे स्वयं नोपानहौ हरेत्

न पादक्षालनं कुर्यात् पादेनैव कदाचन

वाय्वग्निगुरुविप्रान् वा सूर्यं वा शशिनं प्रति

बहिर्निष्क्रमणं चैव न कुर्वोत कथञ्चन

उभयोः संध्ययोर्नित्यं मध्याह्ने चैव वर्जयेत्

न चासनं पदा वापि न देवप्रतिमां स्पृशेत्

नावगाहेदगाधाम्बु धारयेन्नानिमित्ततः

नोत्तरेदनुपस्पृश्य नाप्सु रेतः समुत्सृजेत्

चैत्यं वृक्षं न वै छिन्द्यान्नाप्सु ष्ठीवनमाचरेत्

तुषाङ्गारकरीषं वा नाधितिष्ठेत् कदाचन

न चैनं पादतः कुर्यान्मुखेन न धमेद् बुधः

अग्नौ न च क्षिपेदग्निं नाद्भिः प्रशमयेत् तथा

अपण्यं कूटपण्यं वा विक्रये न प्रयोजयेत्

पुण्यस्थानोदकस्थाने सीमान्तं वा कृषेन्न तु

परस्परं पशून् व्यालान् पक्षिणो नावबोधयेत्

सायंप्रातर् गृहद्वारान् भिक्षार्थं नावघट्टयेत्

विगृह्य वादं कुद्वारप्रवेशं च विवर्जयेत्

स्वमग्निं नैव हस्तेन स्पृशेन्नाप्सु चिरं वसेत्

मुखे नैव धमेदग्निं मुखादग्निरजायत

नैकश्चरेत् सभां विप्रः समवायं च वर्जयेत्

न वीजयेद् वा वस्त्रेण न देवायतने स्वपेत्

न व्याधिदूषितैर्वापि न शूद्रैः पतितेन वा

नाग्निगोब्राह्मणादीनामन्तरेण व्रजेत् क्वचित्

न निन्देद् योगिनः सिद्धान् व्रतिनो वायतींस्तथा

नाक्रामेत् कामतश्छायां ब्राह्मणानां च गोरपि

नाङ्गारभस्मकेशादिष्वधितिष्ठेत् कदाचन

न भक्षयेदभक्ष्याणि नापेयं च पिबेद् द्विजः