कूर्मपुराणम्

नोपानहौ स्त्रजं चाथ पादुके च प्रयोजयेत्

नापसव्यं परीदध्याद् वासो न विकृतं वसेत्

रूपलक्षणसंयुक्तान् योनिदोषविवर्जितान्

आहरेद् ब्राह्मणो भार्यां शीलशौचसमन्विताम्

वर्जयेत् प्रतिषिद्धानि प्रयत्नेन दिनानि तु

ब्रह्मचारी भवेन्नित्यं तद्वज्जन्मत्रयाहनि

व्रतानि स्नातको नित्यं पावनानि च पालयेत्

अकुर्वाणः पतत्याशु नरकानतिभीषणान्

कुर्याद् गृह्याणि कर्माणि संध्योपासनमेव च

दैवतान्यपि गच्छेत कुर्याद् भार्याभिपोषणम्

कुर्वोतात्महितं नित्यं सर्वभूतानिकम्पकः

वेषवाग्बुद्धिसारूप्यमाचरन् विचरेत् सदा

तमाचारं निषेवेत नेहेतान्यत्र कर्हिचित्

तेन यायात् सतां मार्गं तेन गच्छन् न रिष्यति

सत्यवादी जितक्रोधो ब्रह्मभूयाय कल्पते

अनसूयी मृदुर्दान्तो गृहस्थः प्रेत्य वर्धते

सावित्रीजाप्यनिरतः श्राद्धकृन्मुच्यते गृही

दान्तो यज्वा देवभक्तो ब्रह्मलोके महीयते

कुर्यादहरहर्नित्यं नमस्येत् प्रयतः सुरान्

गृहस्थस्तु समाख्यातो न गृहेण गृही भवेत्

अध्यात्मनिरतं ज्ञानमेतद् ब्राह्मणलक्षणम्

यथाशक्तिं चरन् कर्म निन्दितानि विवर्जयेत्

गृहस्थो मुच्यते बन्धात् नात्र कार्या विचारणा

अन्यमन्युसमुत्थानां दोषाणां मर्षणं क्षमा

दयेति मुनयः प्राहुः साक्षाद् धर्मस्य साधनम्

विज्ञानमिति तद् विद्याद् येन धर्मो विवर्धते

धर्मकार्यान्निवृत्तश्चेन्न तद् विज्ञानमिष्यते

यथाभूतप्रवाद् तु सत्यमाहुर्मनीषिणः

अध्यात्ममक्षरं विद्याद् यत्र गत्वा न शोचति