त्वत्स्पर्शवायुनाः पूता यास्यंति मम मंदिरम्
मत्पार्षदा भविष्यंति सर्व कालं निरामयाः
कोटिजन्मार्जितं पापं भारते यत्कृतं नृभिः
स्पर्शनाद्दर्शनाद्देव्याः पुण्यं दशगुणं ततः
शतकोटिजन्मपापं नश्यतीति श्रुतौ श्रुतम्
जन्मसंख्यार्जितान्येव कामतोऽपि कृतानि च
पुण्याहस्नानतः पुण्यं वेदा नैव वदंति च
ब्रह्मविष्णुशिवाद्याश्च सर्वं नैव वदंति च
पुण्यं दशगुणं चैव मौसलस्नानतः परम्
अमायां चापि तत्तुल्यं द्विगुणं दक्षिणायने 9.11.
चतुर्मास्यां पौर्णमास्यामनंतं पुण्यमेव च
असंख्यपुण्यफलदमेतेषु स्नानदानकम्
मन्वतराद्यायां तिथौ युगाद्यायां तथैव च
अथाप्यशोकाष्टम्यां च नवम्यां च तथा हरेः
दशहरादशम्यां तु युगाद्यादिसमं फलम्
ततश्चतुर्गुणं पुण्यं द्विमहत्पूर्वके सति
चंद्रोपरागसमये सूर्ये दशगुणं ततः
इत्येवमुक्त्वा देवेशो विरराम तयोः पुरः
गंगोवाच तवाज्ञया च राजेंद्र तपसा चैव सांप्रतम्
दास्यंति पापिनो मह्यं पापानि यानि कानि च 9.11.
कतिकालं परिमितं स्थितिर्मे तत्र भारते
ममान्यद्वाछितं यद्यत्सर्वं जानासि सर्ववित्
श्रीभगवानुवाच पतिस्ते द्रवरूपाया लवणोदो भविष्यति
स ममांश स्वरूपश्च त्वं च लक्ष्मीस्वरूपिणी
यावत्यः संति नद्यश्च भारत्याद्याश्च भारते
अद्यप्रभृति देवेशि कलेः पंचसहस्रकम्
नित्यं त्वमब्धिना सार्थं करिष्यसि रहो रतिम्
त्वां स्तोष्यन्ति च स्तोत्रेण भगीरथकृतेन च
कण्वशाखोक्त ध्यानेन ध्यात्वा त्वां पूजयिष्यति
गंगा गंगेति यो ब्रूयाद्योजनानां शतैरपि 9.11.