दृष्ट्वा तु परमाश्चर्यं जग्मुस्तत्पारमीश्वराः
पारिजाततरूणां च वनराजिविराजितम्
कोटियोजनमूर्ध्वं च दैर्घ्यं दशगुणोत्तरम्
प्राकाराकारमस्यैव शिखरे रासमंडलम्
पुष्पोद्यानसहस्रेण पुष्पितेन सुगंधिना
सुरत द्रव्यसंयुक्तै राजितं रतिमंदिरैः
रत्नसोपानयुक्तेन सद्रत्नकलशेन च
सिंदूरवर्णमणिभिः परितः खचितेन च
रत्नप्राकारसंयुक्तमणिभेदैर्विराजितम्
रज्जुग्रंथिसमायुक्तरसालपल्लवान्वितैः । परितः कदलीस्तंभसमूहैश्च समन्वितम्
शुक्लधान्यपर्णजालफलदूवांर्कुरान्वितम्
वेष्टितं गोपकन्यानां समूहैः कोटिशो मुने
रत्नांगुलीयललितैर्हस्तांगुलिविराजितैः
भूषितै रत्नभूषाभिः सद्रत्नमुकुटोज्ज्वलैः
सिंदूरबिंदुना सार्द्धमलकाधःस्थलोज्ज्वलैः
शरत्प्रफुल्लपद्मानां शोभामोषणलोचनैः
प्रफुल्लमालतीमालाजालैःकबरशोभितैः चारुणा गमनेनैव गजखंजनगंजनैः
वक्रभ्रूभंगसंयोगश्लक्ष्णस्मितसमन्वितैः
खगेंद्रचंचुशोभाढ्यनासिकोन्नतभूषितैः
नितम्बकठिनश्रोणीपीनभारभरानतैः
दर्पणैः पूर्णचंद्रास्यसौंदर्यदर्शनोत्सुकैः
सुंदरीणां समूहैश्च रक्षितं राधिकाज्ञया
श्वेतरक्तैर्लोहितैश्च वेष्टितैः पद्मराजितैः
भोगद्रव्यसकर्पूरतांबूलवस्त्रसंयुतैः
विचित्रपुष्पमालाभिः शोभितैः शोभितं मुने
ततो विचक्षणं रम्यं ददृशुः सुंदरं वनम्
क्रीडास्थानं तयोरेव कल्पवृक्षचयान्वितम्
कस्तूरीयुक्तपत्राब्जैः पुष्पौघैः सुरभीकृतम्
कुत्र हेलिकदंबानां कदंबैः कमनीयकम्
सुगंधिकुसुमानां च गंधेन सुरभीकृतम्