भिक्षां कृत्वा तु कवचमानीय च नृपस्य च
एतस्मिन्नन्तरे देवा जग्मुः स्वस्थानमुत्तमम्
परशुराम उवाच कालभेदे जयो नृणां कालभेदे पराजयः
अधीतं विधिवद्दत्तं कृत्स्ना पृथ्वी सुशासिता
जिताः सर्वे च राजेन्द्रा लीलया रावणो जितः
रामस्य वचनं श्रुत्वा राजा परमधार्मिकः
राजोवाच गताः कतिविधा भूपा मादृशा धरणीतले
बुद्धिस्तेजो विक्रमश्च विविधा रणमन्त्रणा
आचारो विनयो विद्या प्रतिष्ठा परमं तपः
सा च स्त्री प्राणतुल्या मे साध्वी पद्मांशसम्भवा 3.40.
आबाल्यात्संगिनी शश्वच्छयने भोजने रणे
त्वया न दृष्टं युद्धं मे पुरेयं शोचना स्थिता
काले सिंहः सृगालं च सृगालः सिंहमेव च
महिषं मक्षिका काले गरुडं च तथोरगः
इन्द्रं च मानवः काले काले ब्रह्मा मरिष्यति
मरिष्यन्ति सुराः सर्वे त्रिलोकस्थाश्चराचराः
कालस्य कालः श्रीकृष्णः स्रष्टुः स्रष्टा यथेच्छया
महास्थूलात्स्थूलतमः सूक्ष्मात्सूक्ष्मतमः कृशः
ततः क्षुद्रविराड् जातः सर्वेषां कारणं परम् 3.40.
नाभेः कमलदण्डस्य योऽन्तं न प्राप यत्नतः
तपश्चक्रे ततस्तत्र लक्षवर्षं च वायुभुक्
गोपगोपीपरिवृतं द्विभुजं मुरलीधरम्
दृष्ट्वाऽनुज्ञां गृहीत्वा च प्रणम्य च पुनः पुनः
यः शिवः सृष्टिसंहर्त्ता स च स्रष्टुर्ललाटजः
सृष्टिकारणभूताश्च ब्रह्मविष्णुमहेश्वराः
तेऽपि देवाः प्राकृतिकाः प्राकृतश्च महाविराट्
न शक्तः परमेशोऽपि तां शक्तिं प्रकृतिं विना
सा च कृष्णे तिरोभूय सृष्टिसंहारकारके
कुलालश्च कटं कर्तुं यथाऽशक्तो मृदं विना 3.40.
सा च शक्तिः सृष्टिकाले पञ्चधा चेश्वरेच्छया