ददर्श मङ्गलं रामः शुश्राव जयसूचकम्
यात्राकाले च पुरतः शुश्राव सहसा मुनिः
आकाशवाणीसंगीतं जयस्ते भवितेति च
चकार यात्रां भगवाञ्छ्रुत्वैवं विविधं शुभम्
ज्वलत्प्रदीपं दधतीं पतिपुत्रवतीं सतीम्
शिवं शिवां पूर्णकुम्भं चाषं च नकुलं तथा
कृष्णसारं गजं सिंहं तुरगं गण्डकं द्विपम्
मयूरं खञ्जनं चैव शंखचिल्लं चकोरकम्
सौदामनीं शक्रचापं सूर्य्यं सूर्याप्रभां शुभाम् 3.33.
माणिक्यं रजतं मुक्तां मणीन्द्रं च प्रवालकम्
पर्णं पताकां छत्रं च दर्पणं श्वेतचामरम्
दुग्धमाज्यं तथा पूगममृतं पायसं तथा
मार्ज्जारं च वृषेन्द्रं च मेषं पर्वतमूषिकम्
कस्तूरीं व्यजनं तोयं हरिद्रां तीर्थमृत्तिकाम्
मृगं वेश्यां षट्पदं च कर्पूरं पीतवाससम्
गोष्ठं गवां वर्त्म रम्यां गोशालां गोगतिं शुभाम्
ताम्रं च स्फटिकं वन्द्यं सिन्दूरं माल्यचन्दनम्
सुगन्धिवायोराघ्राणं प्राप विप्राशिषं शुभाम्
इत्येवं मङ्गलं ज्ञात्वा प्रययौ स मुदाऽन्वितः 3.33.
पौलस्त्यतपसः स्थानं सुगन्धिमरुदन्वितम्
सुष्वाप पुष्पशय्यायां किङ्करैः परिसेवितः
निशातीते च स भृगुश्चारु स्वप्नं ददर्श ह
गजाश्वशैलप्रासादगोवृक्षफलितेषु च
आरुह्यमाणमात्मानं नौकायां चन्दनोक्षितम्
विण्मूत्रोक्षितसर्वांगं वसापूयसमन्वितम्
विस्तीर्णपद्मपत्त्रैश्च स्वं ददर्श सरित्तटे
भुक्तवन्तं च ताम्बूलं लभन्तं ब्राह्मणाशिषम्
परिपक्वफलं क्षीरमुष्णान्नं शर्करान्वितम् 3.33.
जलौकसा वृश्चिकेन मीनेन भुजगेन च
ततो ददर्श चात्मानं मण्डलं चन्द्रसूर्य्ययोः