रुद्राणां वैष्णवानां च ज्ञानिनां यो हि शङ्करः
प्रजापतीनां यो ब्रह्मा सिद्धानां कपिलः स्वयम्
देवानां यो हि विष्णुश्च देवीनां प्रकृतिः स्वयम् नारीणां शतरूपा च बहुरूपं नमाम्यहम्
ऋतूनां यो वसन्तश्च मासानां मार्गशीर्षकः 3.32.
सागरः सरितां यश्च पर्वतानां हिमालयः
पत्राणां तुलसीपत्रं दारुरूपेषु चन्दनम्
पुष्पाणां पारिजातश्च सस्यानां धान्यमेव च
ऐरावतो गजेन्द्राणां वैनतेयश्च पक्षिणाम्
तैजसानां सुवर्णं च धान्यानां यव एव च
यक्षाणां च कुबेरो यो ग्रहाणां च बृहस्पतिः
वेदसंघश्च शास्त्राणां पण्डितानां सरस्वती
मन्त्राणां विष्णुमन्त्रश्च तीर्थानां जाह्नवी स्वयम्
बलं यो वै बलवतां मनो वै शीघ्रगामिनाम् 3.32.
ज्ञानदाता गुरूणां च मातृरूपश्च बन्धुषु । मित्रेषु जन्मदाता यस्तं सारं प्रणमाम्यहम्
शिल्पिनां विश्वकर्मा यः कामदेवश्च रूपिणाम्
प्रियेषु पुत्ररूपो यो नृपरूपो नरेषु च
धर्म्मः कल्याणबीजानां वेदानां सामवेदकः
जले शैत्यस्वरूपो यो गन्धरूपश्च भूमिषु
क्रतूनां राजसूयो यो गायत्री छन्दसां च यः
क्षीरस्वरूपो गव्यानां पवित्राणां च पावकः
तृणानां कुशरूपो यो व्याधिरूपश्च वैरिणाम्
तेजोरूपो ज्ञानरूपः सर्वरूपश्च यो महान्
सर्वाधारेषु यो वायुर्यथाऽऽत्मा नित्यरूपिणाम् 3.32.
वेदानिर्वचनीयं यन्न स्तोतुं पण्डितः क्षमः
वेदा न शक्ता यं स्तोतुं जडीभूता सरस्वती
शुद्धतेजस्स्वरूपं च भक्तानुग्रहविग्रहम्
द्विभुजं मुरलीवक्त्रं किशोरं सस्मितं मुदा
राधया दत्तताम्बूलं भुक्तवन्तं मनोहरम्
रत्नभूषणभूषाढ्यं सेवितं श्वेतचामरैः
वृन्दावनान्तरे रम्ये रासोल्लाससमुत्सुकम्