पार्वत्युवाच चिरजीवी च योगीन्द्रो हरिभक्तस्य का विपत्
अद्यप्रभृति निर्विघ्ना हरौ भक्तिर्दृढाऽस्तु ते
इत्युक्त्वा पार्वती तुष्टा बालं धृत्वा च वक्षसि
शनिर्जगाम देवानां समीपं हृष्टमानसः
नारायण उवाच पूजयामास तं बालमुपहारैरनुत्तमैः
सर्वाग्रे तव पूजा च मया दत्ता सुरोत्तम
वनमालां ददौ तस्मै ब्रह्मज्ञानं च मुक्तिदम्
ददौ द्रव्याणि चारूणि चोपचारांश्च षोडश
विघ्नेशश्च गणेशश्च हेरम्बश्च गजाननः
एतान्यष्टौ च नामानि सर्वसिद्धिप्रदानि च
सिद्धासनं ददौ धर्मस्तस्मै ब्रह्मा कमण्डलुम्
रत्नसिंहासनं शक्रः सूर्य्यश्च मणिकुण्डले
वह्निशुद्धं च वसनं ददौ तस्मै हुताशनः
क्षीरोदोद्भवसद्रत्नरचितं वलयं वरम्
कण्ठभूषां च सावित्री भारती हारमुज्ज्वलम्
मुनयः पर्वताश्चैव रत्नानि विविधानि च
क्रमेण देवा देव्यश्च मुनयः पर्वतादयः
नानाविधानि द्रव्याणि स्वादूनि मधुराणि च
पार्वती जगतां माता स्मेराननसरोरुहा
सर्वतीर्थोदकै रत्नकलशावर्जितैः स्तुतैः अग्निशुद्धे च वसने ददौ तस्मै सती मुदा
गोदावर्युदकैः पाद्यमर्घ्यं गंगोदकेन च
पुष्करोदकमानीय पुनराचमनीयकम्
पारिजातप्रसूनानामन्येषां शतकानि च पूजार्हाणि च पत्राणि तुलसीसहितानि च
चन्दनागुरुकस्तूरी कुंकुमानि च सादरम्
नैवेद्यं तत्प्रियं चैव तिललड्डुकपर्वतान्
पक्वान्नानां पर्वताश्च सुस्वादुसुमनोहरान्
गुडाक्तानां च लाजानां पृथुकानां च पर्वतान् पयोभृत्कलशानां च लक्षाणि प्रददौ मुदा
लक्षाणि दधिपूर्णानां कलशानां च पूजने
सर्पिस्सुवर्णकुम्भानां पंचलक्षाणि सादरम्
खर्जूराणां कपित्थानां जम्बूनां विविधानि च । फलानि नारिकेलानामसंख्यानि ददौ मुदा