ब्रह्माऽऽजगाम हृष्टश्च ब्रह्मलोकात्सभार्य्यकः
विष्णुः क्षीरोदशायी च सलक्ष्मीकश्चतुर्भुजः
वनमालाधर श्यामो भूषितो रत्नभूषणैः
सनकश्च सनन्दश्च कपिलश्च सनातनः
यतिश्च सुमतिश्चैव वसिष्ठश्च सहानुगः
अगस्त्यश्च प्रचेताश्च दुर्वासाश्च्यवनस्तथा
बृहस्पतिरुतथ्यश्च संवर्तः सौभरिस्तथा
गोकामुखो वक्ररथः पारिभद्रः पराशरः
मार्कण्डेयो मृकण्डुश्च पुष्करो लोमशस्तथा
कात्यायनः कणादश्च पाणिनिः शाकटायनः
एते चान्ये च बहवः सशिष्या मुनयो मुने
दिक्पालाश्च तथा देवा यक्षगन्धर्वकिन्नराः
हिमालयः शैलराजः सापत्यश्च सभार्यकः
तथा सम्भृतसम्भारो नानाद्रव्यसमन्वितः
नानाप्रकारवस्तूनि जगत्यां दुर्लभानि च
दशलक्षं गवां रत्नं शतलक्षं सुवर्णकम्
मुक्तानां च चतुर्लक्षं कौस्तुभानां सहस्रकम् अनन्तरत्नप्रभव आजगाम सुताव्रते
ब्राह्मणा मनवः सिद्धा नागा विद्याधरास्तथा
कैलासराजमार्गं च चन्दनेन सुसंस्कृतम्
दूर्वाधान्यफलैः पर्णलाजपुष्पैर्विभूषितम्
उच्चैः सिंहासनेष्वेते पूजिताः शङ्करेण च
दानाध्यक्षः शुनासीरः कुबेरः कोशरक्षकः
दध्नां नद्यः सहस्राणि दुग्धानां च तथैव च
माध्वीकानां सहस्राणि तैलानां च शतानि च
पीयूषाणां च कुम्भानि शतलक्षाणि नारद यवगोधूमचूर्णानां घृताक्तानां च नारद
स्वस्तिकानां च पूर्णानां बभूवुर्लक्षराशयः
शालीनां पृथुकानां च राशीनां दशकोटयः
स्वर्णरौप्यप्रवालानां मणीनां च महामुने
पायसं पिष्टकं चैव शाल्यन्नं सुमनोहरम्
बुभुजे देवर्षिगणैः शिवो नारायणेन च