स्वामी स्वांशेन सुस्त्रीणां गर्भे जन्म लभेद्ध्रुवम्
असाध्वी वैरितुल्या च शश्वत्सन्तापदायिनी
किमुपायं करिष्यामि वद योगीश्वरेश्वर
इत्युक्त्वा पार्वती देवी नम्रवक्त्रा बभूव ह
सत्पुत्रबीजं सुखदं तापनाशनकारणम्
श्रीमहादेव उवाच उपायतः कार्य्यसिद्धिर्भवत्येव जगत्त्रये
सर्ववांछितसिद्धेस्तु बीजरूपं सुमङ्गलम्
हरेराराधनं कृत्वा व्रतं कुरु वरानने
महाकठोरबीजं च वाञ्छाकल्पतरुं परम्
नदीनां च यथा गंगा देवानां च हरिर्यथा
वर्णानां च यथा विप्रस्तीर्थानां पुष्करं यथा
यथा पुण्यप्रदानां च तिथिरेकादशी स्मृता मासानां मार्गशीर्षश्चाप्यृतूनां माधवो यथा
संवत्सरो वत्सराणां युगानां च कृतं यथा साध्वी पत्नी यथाप्तानां विश्वस्तानां मनो यथा
यथा धनानां रत्नं च प्रियाणां च यथा पतिः
फलानां वै चूतफलं वर्षाणां भारतं तथा
यथा काशी पुरीणां च सूर्य्यस्तेजस्विनां यथा
शास्त्राणां च यथा वेदाः सिद्धानां कपिलो यथा
यशोदानां यथा विद्या कविता च मनोहरा
विभवानां हरिकथा सुखानां हरिचिन्तनम्
पापानां च यथा मिथ्या पापिनां पुंश्चली यथा
यथा घृतं च गव्यानां यथा ब्रह्मा तपस्विनाम्
पुण्यदानां यथा तोयं शुद्धानां च हुताशनः
गरुडः पक्षिणां चैव हस्तिनामिन्द्रवाहनम्
गन्धर्वाणां चित्ररथो जीवो बुद्धिमतां यथा
स्रोतस्वतां समुद्रश्च यथा पृथ्वी क्षमावताम्
पवित्राणां वैष्णवाश्च वर्णानां प्रणवो यथा
विदुषां च यथा वाणी गायत्री छन्दसां यथा
यथा पिता ते शैलानां गवां च सुरभिर्यथा
सुखदानां यथा लक्ष्मीर्मनो वै शीघ्रगामिनाम्
शालग्रामश्च मूर्तीनां पर्शूनां विष्णुपञ्जरः