पितामहः पितृपिता तत्पिता प्रपितापहः 1.10.
मातामहः पिता मातुः प्रमातामह एव च
पितामही पितुर्माता तच्छ्वश्रूः प्रपितामही
मातामही मातृमाता मातृतुल्या च पूजिता
वृद्धमातामही ज्ञेया पत्पितुः कामिनी तथा
पितृष्वसा पितुर्मातृष्वसा मातुस्स्वसा स्मृता
धनभाग्वीर्य्यजश्चैव पुंसि जन्ये च वर्त्तते
पुत्रपत्नी वधू ज्ञेया जामाता दुहितुः पतिः
देवरः स्वामिनो भ्राता ननांदा स्वामिनः स्वसा
भार्य्या जाया प्रिया कान्ता स्त्री व पत्नी प्रकीर्तिता
पत्नीमाता तथा श्वश्रूस्तत्पिता श्वशुरः स्मृतः 1.10.
भगिनीजो भागिनेयो भ्रातृजो भ्रातृपुत्रकः
श्यालीपतिस्तु भ्राता च श्वशुरैकत्वहेतुना
अन्नदाता भयत्राता पत्नीतातस्तथैव च
अन्नदातुश्च या पत्नी भगिनी गुरुकामिनी माता च तत्सपत्नी च कन्या पुत्रप्रिया तथा
मातुर्माता पितुर्माता श्वश्रूपित्रोः स्वसा तथा
पौत्रस्तु पुत्रपुत्रे च प्रपौत्रस्तत्सुतेऽपि च
कन्यापुत्रश्च दौहित्रस्तत्पुत्राद्याश्च बांधवाः
भ्रातृपुत्रस्य पुत्राद्यास्ते पुनर्ज्ञातयः स्मृताः
गुरुकन्या च भगिनी पोष्या मातृसमा मुने
पुत्रस्य श्वशुरो भ्राता बन्धुर्वैवाहिकः स्मृतः 1.10.
गुरुश्च कन्यकायाश्च भ्राता सुस्निग्धबान्धवः
बन्धुता येन सार्द्ध च तन्मित्रं परिकीर्तितम्
बान्धवो दुःखदो दैवान्निस्सम्बन्धोऽसुखप्रदः
विद्याजो योनिजश्चैव प्रीतिजश्च प्रकीर्तितः
मित्रमाता मित्रभार्य्या मातृतुल्या न संशयः
चतुर्थं नामसम्बन्धमित्याह कमलोद्भवः
उपपत्न्यां नवज्ञा च प्रेयसी चित्तहारिणी
सम्बन्धो देशभेदे च सर्वदेशे विगर्हितः
दुस्त्यजश्च महद्भिस्तु देशभेदे विधीयते