चेतनां च ददौ तस्मै स्वयं चैतन्यरूपिणी
तमुवाच प्रसन्नाऽसौ कृपयाऽतिकृपामयी
श्रीप्रकृतिरुवाच ब्रह्मत्वममरत्वं वा ततो वाऽतिसुदुर्लभम्
इन्द्रत्वं वा मनुत्वं वा सर्वसिद्धत्वमेव च
वैश्य उवाच ततोऽतिदुर्लभं किं वा न जाने तदभीप्सितम्
त्वय्येव शरणापन्नो देहि यद्वाञ्छितं तव
प्रकृतिरुवाच यतो यास्यसि गोलोकं पदमेव सुदुर्लभम्
सर्वसारं च यज्ज्ञानं सुरर्षीणां सुदुर्लभम्
स्मरणं वन्दनं ध्यानमर्चनं गुणकीर्त्तनम्
एतदेवं वैष्णवानां नवधा भक्तिलक्षणम् 2.63.
आयुर्हरति लोकानां रविरेव हि सन्ततम्
भक्तास्तद्गतचित्ताश्च वैष्णवाश्चिरजीविनः
शिवः शेषश्च धर्मश्च ब्रह्मा विष्णुर्महान्विराट्
वोढुः पञ्चशिखो दक्षो नारदश्च सनातनः
मेधावी लोमशः शुक्रो वसिष्ठः क्रतुरेव च
मार्कण्डेयो बलिश्चैव प्रह्लादश्च गणेश्वरः
अकूपार उलूकश्च नाडीजंघश्च वायुजः
नवधा भक्तियुक्ताश्च कृष्णस्य परमात्मनः
ये तद्भक्तास्ते तदंशा जीवन्मुक्ताश्च सन्ततम्
ऊर्ध्वं च सप्त स्वर्गाश्च सप्तद्वीपा वसुन्धरा 2.63.
एवंविधानां विश्वानां संख्या नास्त्येव पुत्रक
देवा देवर्षयश्चैव मनवो मानवादयः
महाविष्णोर्लोमकूपे सन्ति विश्वानि यस्य च
भज सत्यं परं ब्रह्म नित्यं निर्गुणमच्युतम्
निरीहं च निराकारं निर्विकारं निरञ्जनम्
स्वेच्छामयं सर्वरूपं भक्तानुग्रहविग्रहम्
ध्यानासाध्यं दुराराध्यं शिवादीनां च योगिनाम्
सर्वाधारं च सर्वज्ञं सर्वानन्दकरं परम्
दास्यदं धर्मदं चैव सर्वसिद्धिप्रदं सताम् 2.63.
परात्परतरं शुद्धं परिपूर्णतमं शिवम्