मालावतीं पूर्वकोणे वह्निकोणे च माधवीम्
पश्चिमे वै शशिकलां पारिजातां च मारुते
यूथिकामालतीपद्ममाला दद्याद् व्रते व्रती
त्वं देवी जगतां माता विष्णुमाया सनातनी
कृष्णप्रेममयी शक्तिः कृष्णे सौभाग्यरूपिणी
अद्य मे सफलं जन्म जीवनं सार्थकं मम
कृष्णवक्षसि या राधा सर्वसौभाग्यसंयुता
कृष्णप्रिया च गोलोके तुलसीकानने तु या
चन्द्रावली चन्द्रवने शतशृंगे सतीति च
पद्मावती पद्मवने कृष्णा कृष्णसरोवरे 2.55.
वैकुण्ठे च महालक्ष्मीर्वाणी नारायणोरसि
सर्वस्वर्गे स्वर्गलक्ष्मीर्देवदुःखविनाशिनी
सावित्री वेदमाता च कलया ब्रह्मवक्षसि
कलया तुलसी त्वं च गङ्गा भुवनपावनी
कला कलांशरूपा च शतरूपा शची दितिः
देव्यश्च मुनिपत्न्यश्च त्वत्कलाकलया शुभे
एवं कृत्वा परीहारं स्तुत्वा च कवचं पठेत्
एवं नित्यं पूजयेद्यो विष्णुतुल्यः स भारते
कार्त्तिकीपूर्णिमायां च राधां यः पूजयेच्छिवे
परमैश्वर्य्ययुक्तः स्यादिह लोके स पुण्यवान् 2.55.
आदावेवं क्रमेणैव रासे वृन्दावने वने
संपूजिता द्वितीये च धात्रा त्वेवं क्रमेण च
नारायणो महालक्ष्मीं प्राप संपूज्य भारतीम्
विष्णुः क्षीरोदशायी च प्राप सिन्धुसुतां तथा
त्वमेव दुर्गा सम्प्राप्ता पूजिता पुष्करे च सा
कामो रतिं च संप्राप धर्मो मूर्तिं पतिव्रताम्। देवाश्च मुनयश्चैव यां संपूज्य प्रतिव्रताम्
संप्रापुर्यद्वरेणैव धर्मकामार्थमोक्षकम्
श्रीमहेश्वर उवाच संसक्तस्य तुलस्यां च गोप्यां च तुलसीवने
सा संहृत्य स्वमूर्त्तीश्च कलाः सर्वाश्च लीलया
भ्रष्टैश्वर्य्याश्च निश्श्रीका भार्य्याहीना ह्युपद्रुताः 2.55.