श्रीपार्वत्युवाच कथं जग्राह राधाया मन्त्रं वै वैष्णवो नृपः
किं विधानं च किं ध्यानं किं स्तोत्रं कवचं च किम्
श्रीमहेश्वर उवाच शीघ्रं प्राप्नोमि गोलोकं कस्याराधनतो मुने
इत्युक्तवन्तं राजेन्द्रमुवाच ब्राह्मणोत्तमः
तत्प्राणाधिष्ठातृदेवीं भज राधां परात्पराम्
इत्युक्त्वा राधिकामन्त्रं ददौ तस्मै षडक्षरम्
प्राणायामं भूतशुद्धिं मन्त्रन्यासं तथैव च
स्तोत्रं च कवचं तं च शिक्षयामास भक्तितः
ध्यानं च सामवेदोक्तं मंगलानां च मंगलम्
श्वेतचम्पकवर्णाभां कोटिचन्द्रसमप्रभाम् सुश्रोणीं सुनितम्बां च पक्वबिम्बाधरां वराम्।।2.55.
मुक्तापंक्तिप्रतिनिधिदन्तपंक्तिमनोहराम् वह्निशुद्धांशुकाधानां रत्नमालाविभूषिताम्
रत्नकेयूरवलयां रत्नमञ्जीररञ्जिताम् सूर्य्यप्रभाप्रतिकृतिगण्डस्थलविराजिताम्
अमूल्यरत्नखचितग्रैवेयकविभूषिताम् रत्नांगुलीयसंयुक्तां रत्नपाशकशोभिताम्
बिभ्रतीं कबरीभारं मालतीमाल्यशोभिताम्
गोपीभिः सुप्रियाभिश्च सेवितां श्वेतचामरैः
सिन्दूरबिन्दुना चारुसीमन्ताधःस्थलोज्ज्वलाम्
कृष्णसौभाग्यसंयुक्तां कृष्णप्राणाधिकां वराम्
महाविष्णुविधात्रीं च प्रदात्रीं सर्वसम्पदाम्
वैष्णवीं विष्णुमायां च कृष्णप्रेममयीं शुभाम् रासे रासेश्वरयुतां राधां रासेश्वरीं भजे
ध्यात्वा पुष्पं मूर्ध्नि दत्त्वा पुनर्ध्यायेज्जगत्प्रभुम् 2.55.
आसनं वसनं पाद्यमर्घ्यं गन्धानुलेपनम्
नानाप्रकारनैवेद्यं ताम्बूलं वासितं जलम्
प्रत्येकं वेदमन्त्रेण दत्तं भक्त्या च भूभृता
रत्नसारविकारं च निर्मितं विश्वकर्मणा
अमूल्यरत्नखचितममूल्यं सूक्ष्ममेव च
सद्रत्नसारपा?स्थं सर्वतीर्थोदकं शुभम्
दक्षिणावर्त्तशङ्खस्थं सदूर्वापुष्पचन्दनम्
पार्थिवद्रव्यसंभूतमतीव सुरभीकृतम्
श्रीखण्डचूर्णं सुस्निग्धं कस्तूरीकुंकुमान्वितम्
वृक्ष निर्याससंयुक्तं पार्थिवद्रव्यसंयुतम् 2.55.