सुकृतीनां दुष्कृतीनां यद्यत्स्थानं शुभाशुभम्
ततो गणेशखण्डे च तज्जन्म परिकीर्तितम्
गणेशभृगुसंवादे सर्वतत्त्वनिरूपणम्
श्रीकृष्णजन्मखण्डं च कीर्तितं च ततः परम्
भुवो भारावतरणं क्रीडाकौतुकमङ्गलम्
इदं ते कथितं विप्र पुराणप्रवरं परम्
सर्वेषामीप्सितं श्रीदं सर्वाशापूर्णकारणम्
सारभूतं पुराणेषु केवलं वेदसंमितम्
ब्रह्मवैवर्तकं तेन प्रवदन्ति पुराविदः
निरामये च गोलोके कृष्णेन परमात्मना 1.1.
धर्मेण दत्तं पुत्राय प्रीत्या नारायणाय च
नारदो व्यासदेवाय प्रददौ जाह्नवीतटे
मह्यं ददौ सिद्धक्षेत्रे पुण्यदेशे मनोहरम्
अष्टादशसहस्रं तु व्यासेनेदं पुराणकम् तत्फलं लभते नूनमध्यायश्रवणेन च
शौनक उवाच सर्वं कथय संव्यस्य ब्रह्मखण्डमनुत्तमम्
सौतिरुवाच हरिं देवान्द्विजान्नत्वा धर्मान्वक्ष्ये सनातनान्
यच्छ्रुतं व्यासवक्त्रेण ब्रह्मखण्डमनुत्तमम्
ज्योतिःसमूहं प्रलये पुराऽऽसीत्केवलं द्विज
स्वेच्छामयस्य च विभोस्तज्ज्योतिरुज्ज्वलं महत्
तेषामुपरि गोलोकं नित्यमीश्वरवद् द्विज
तेजःस्वरूपं सुमहद्रत्नभूमिमयं परम्
योगेन धृतमीशेन चान्तरिक्षस्थितं वरम्
सद्रत्नरचितासंख्यमन्दिरैः परिशोभितम्
तदधो दक्षिणे सव्ये पञ्चाशत्कोटियोजनान् 1.2.
कोटियोजनविस्तीर्णं वैकुण्ठं मण्डलाकृति
चतुर्भुजैः पार्षदैश्च जरामृत्य्वादिवर्जितम्
लये शून्यं च सृष्टौ च सपार्षदशिवान्वितम्
परमाह्लादकं शश्वत्परमानन्दकारकम्
तदेवानन्दजनकं निराकारं परात्परम्
नवीननीरदश्यामं रक्तपङ्कजलोचनम्