चतुर्भुजश्च वैकुण्ठं प्रययौ पद्मया सह
महालक्ष्मीश्च योगेन नानारूपा बभूव सा
शुद्धसत्त्वस्वरूपा च सर्वसौभाग्यसंयुता
स्वर्गे च स्वर्गलक्ष्मीश्च शक्रसम्पत्स्वरूपिणी
गृहलक्ष्मीर्गृहेष्वेव गृहिणी च कलांशया
गवां प्रसूः सा सुरभिर्दक्षिणा यज्ञकामिनी 2.35.
शोभारूपा च चन्द्रे सा सूर्य्यमण्डलमण्डिता
नृपेषु नृपपत्नीषु दिव्यस्त्रीषु गृहेषु च
प्रतिमासु च देवानां मङ्गलेषु घटेषु च
मणींद्रेषु च हारेषु क्षीरं वै चन्दनेषु च
वैकुण्ठे पूजिता साऽऽदौ देवी नारायणेन च
विष्णुना पूजिता सा च क्षीरोदे भारते मुने
ऋषीन्द्रैश्च मुनीन्द्रैश्च सद्भिश्च गृहिभिर्भवेत्
शुक्लाष्टम्यां भाद्रपदे पूजा वै ब्रह्मणा कृता
चैत्रे पौषे च भाद्रे च पुण्ये मङ्गलवासरे
वर्षान्ते पौषसंक्रांत्यां मेध्यामावाह्य चाङ्गणे 2.35.
राज्ञा संपूजिता सा वै मङ्गलेनैव मङ्गला
ध्रुवेणौत्तानपादेन शक्रेण बलिना तथा
प्रियव्रतेन चन्द्रेण कुबेरेणैव वायुना
एवं सर्वत्र सर्वैश्च वन्दिता पूजिता सदा
इति श्रीब्रह्मवैवर्त्ते महापुराणे द्वितीये प्रकृतिखण्डे नारदनारायणसंवादे लक्ष्म्युपाख्याने लक्ष्मीस्वरूपपूजादिवर्णनं नाम पञ्चत्रिंशोऽध्यायः
नारद उवाच वैकुण्ठाधिष्ठातृदेवी महालक्ष्मीः सनातनी
कथं बभूव सा देवी पृथिव्यां सिन्धुकन्यका
पुरा केन स्तुताऽऽदौ सा तन्मे व्याख्यातुमर्हसि
नारायण उवाच बभूव देवसंघश्च मर्त्यलोकश्च नारद
लक्ष्मीः स्वर्गादिकं त्यक्त्वा रुष्टा परमदुःखिता
तदा शोकाद्ययुर्देवा दुःखिता ब्रह्मणः सभाम्
वैकुण्ठे शरणा पन्ना देवा नारायणे परे
तदा लक्ष्मीश्च कलया पुरा नारायणाज्ञया
तदा मथित्वा क्षीरोदं देवा दैत्यगणैः सह