यो मूढो मधु गृह्णाति हत्वा च मधुमक्षिकाः
भक्षितो गरलैर्दग्धो यमदूतेन ताडितः 2.30.
दण्डं करोत्यदंड्ये च विप्रे दण्डं करोति च
तल्लोममानवर्षं च तत्र तिष्ठत्यहर्निशम्
अर्थलोभेन यो भूपः प्रजादण्डं करोति च
ततो वृश्चिकजातिश्च सप्तजन्मसु जायते
ब्राह्मणः शस्त्रधारी यो ह्यन्येषां धावको भवेत्
स तिष्ठति स्वलोमाब्दं कुण्डादिषु शरादिषु
कारागारे सान्धकारे निबध्नाति प्रजाश्च यः
तत्कुण्डं तप्ततोयाक्तं सान्धकारं भयङ्करम्
कीटैर्विद्धो वसेत्तत्र प्रजालोमाब्दमेव च
ततो नक्रादिजातिश्च भवेन्नद्यादिषु ध्रुवम्
वक्षः श्रोणीस्तनास्यं च यः पश्यति परस्त्रियाः
स वसेत्काककुण्डं च काकैश्च क्षुण्णलोचनः
सप्तजन्मदरिद्रश्च महाक्रूरश्च पातकी
यो भारते ताम्रचौरो लौहचौरश्च सुन्दरि
तत्रैव वज्रविड्भोजी वज्रैश्च क्षुण्णलोचनः
भारते देवचौरश्च देवद्रव्यादिहारकः
देहदग्धो हि तद्वज्रैरनाहारश्च शब्दकृत्
त्रिजन्मनि बकः सोऽपि श्वेतहंसस्त्रिजन्मनि 2.30.
ततो रक्तविकारी च शूली वै मानवो भवेत्
रैत्यकांस्यादिपात्रं च यो हरेत्सुरविप्रयोः
स भवेदश्वजातिश्च भारते सप्तजन्मसु
पुंश्चल्यन्नं च यो भुंक्ते पुंश्चलीजीव्यजीवनः
ताडितो यमदूतेन तद्भोजी तत्र तिष्ठति
म्लेच्छसेवी मषीजीवी यो विप्रो भारते भुवि
ताडितो यमदूतेन तद्भोजी तत्र तिष्ठति
त्रिजन्मनि भवेच्छागः कृष्णसर्पस्त्रिजन्मनि
धान्यादि सस्यं ताम्बूलं यो हरेत्सुरविप्रयोः
शताब्दं तत्र निवसेद्यमदूतेन ताडितः 2.30.