चिक्षेप पञ्चबाणश्च पञ्च बाणांश्च तां प्रति
पुलकाञ्चितसर्वांगी कम्पिता रक्तलोचना
क्षणमुद्विग्नतां प्राप क्षणं तन्द्रां सुखावहाम्
क्षणं सा चेतनां प्राप क्षणं प्राप विषण्णताम्
भ्रमन्ती क्षणमुद्वेगाद्विवसन्ती क्षणं पुनः
पुष्पचन्दनतल्पं च तद्बभूवातिकण्टकम्
निलयश्च निराकारः सूक्ष्मवस्त्रं हुताशनः
क्षणं ददर्श तन्द्रायां सुवेषं पुरुषं सती
चन्दनोक्षितसर्वांगं रत्नभूषणभूषितम् 2.16.
कथयन्तं रतिकथां चुम्बन्तमधरं मुहुः
पुनरेव तु गच्छन्तमागच्छन्तं वसन्तकम्
पुनः स्वचेतनां प्राप्य विललाप पुनः पुनः
शङ्खचूडो महायोगी जैगीषव्यान्मनोरमम्
पठन्सदा तु कवचं सर्वमङ्गलमङ्गलम्
आज्ञया ब्रह्मणः सोऽपि बदरीं वै समाययौ
नवयौवनसम्पन्नं कामदेवसमप्रभम्
श्वेतचम्पकवर्णाभं रत्नभूषणभूषितम्
महारत्नगणाक्लृप्तविमानस्थं मनोहरम्
पारिजातप्रसूनाढ्यमाल्यवन्तं च सुस्मितम् 2.16.
सा दृष्ट्वा सन्निधाने तं मुखमाच्छाद्य वाससा
बभूव सा नम्रमुखी नवसङ्गमलज्जिता
पिबन्ती तन्मुखाम्भोजं लोचनाभ्यां च सन्ततम्
पुष्पचन्दनतल्पस्थां वसन्तीं वाससा वृताम्
सुपीनकठिनश्रोणीं पीनोन्नतपयोधराम्
पक्वबिम्बाधरोष्ठीं च सुनासां सुन्दरीं वराम्
स्वतेजसा परिवृतां सुखदृश्यां मनोरमाम्
सिन्दूरबिन्दुना शश्वत्सीमन्ताधःस्थलोज्ज्वलाम्
करपद्मतलारक्तां नखचन्द्रैर्विभूषिताम्
आरक्तवर्णं ललितमलक्तकसमप्रभम् 2.16.
शरदिन्दुविनिन्द्यैकनखेन्द्वोघविराजिताम्