स्थलपद्मप्रभाजुष्टपादपद्मयुगंधराम्
देवेन्द्रमौलिमन्दारमकरन्दकणारुणम्
तपस्विमौलिनिकरभ्रमरश्रेणिसंयुतम्
वरां वरेण्यां वरदां भक्तानुग्रहकातराम्
इति ध्यानेन चानेन ध्यात्वा त्रिपथगां शुभाम्
आसनं पाद्यमर्घ्यं च स्नानीयं चानुलेपनम्
वसनं भूषणं माल्यं गंधमाचमनीयकम् 2.10.
दत्त्वा भक्त्या संप्रणमेत्स्तुत्वा तां संपुटाञ्जलिः
स्तोत्रं वै कौथुमोक्तं च संवादं विष्णुवेधसोः
श्रीब्रह्मोवाच विष्णो विष्णुपदीस्तोत्रं पापघ्नं पुण्यकारणम्
श्रीनारायण उवाच राधांगद्रवसम्भूतां तां गङ्गां प्रणमाम्यहम्
या जन्मसृष्टेरादौ च गोलोके रासमण्डले
गोपैर्गोपीभिराकीर्णे शुभे राधामहोत्सवे
कोटियोजनविस्तीर्णा दैर्घ्ये लक्षगुणा ततः
षष्टिलक्षैर्योजनैर्या ततो दैर्घ्ये चतुर्गुणा
विंशल्लक्षैर्योजनैर्या ततो दैर्घ्ये चतुर्गुणा
त्रिंशल्लक्षैर्योजनैर्या दैर्घ्ये पञ्चगुणा ततः 2.10.
षड्योजनसुविस्तीर्णा दैर्घ्ये दशगुणा ततः
लक्षयोजनविर्स्तार्णा दैर्घ्ये सप्तगुणा ततः
लक्षयोजनविस्तीर्णा दैर्घ्ये षड्गुणिता ततः
योजनैष्षष्टिसाहस्रैर्दैर्घ्ये दशगुणा ततः
लक्षयोजनविस्तीर्णा दैर्घ्ये षङ्गुणिता ततः
दशलक्षै र्योजनैर्या दैर्घ्ये पञ्चगुणा ततः
सहस्रयोजना या च दैर्घ्ये सप्तगुणा ततः
सहस्रयोजनाऽऽयामे दैर्घ्ये सप्तगुणा ततः
पाताले या भोगवती विस्तीर्णा दशयोजना
क्रोशैकमात्रविस्तीर्णा ततः क्षीणा न कुत्रचित् 2.10.
सत्ये या क्षीरवर्णा च त्रेतायामिन्दुसन्निभा
जलप्रभा कलौ या च नान्यत्र पृथिवीतले
यस्याः प्रभाव अतुलः पुराणे च श्रुतौ श्रुतः