सृष्टीनां च कलानां च ब्रह्माण्डानां च नारद
ब्रह्माण्डानां च सर्वेषामीश्वरश्चैक एव सः
ब्रह्मादयश्च तस्यांशास्तस्यांशश्च महाविराट्
स च कृष्णो द्विधाभूतो द्विभुजश्च चतुर्भुजः
ब्रह्मादितृणपर्य्यन्तं सर्वं प्राकृतिकं भवेत्
विद्ध्येकं सृष्टिमूलं तत्सत्यं नित्यं सनातनम्
निरुपाधिं निराकारं भक्तानुग्रहविग्रहम्
द्विभुजं मुरलीहस्तं गोपवेषं किशोरकम्
करोति धाता ब्रह्माण्डं ज्ञानात्मा कम लोद्भवः 2.7.
यस्य ज्ञानाद्यत्तपसा सर्वेशस्तत्समो महान्
महामाया च प्रकृतिः सर्वशक्तिमतीश्वरी
सावित्री वेदमाता च वेदाधिष्ठातृदेवता
सर्वविद्याधिदेवी सा पूज्या च विदुषां पुरा
यत्सेवया यत्तपसा प्रदात्री सर्वसंपदाम्
यत्सेवया यत्तपसा सर्वविश्वेषु पूजिता
सर्वेश्वरी सर्ववन्द्या सर्वेशं प्राप या पतिम्
कृष्णवामांशसम्भूता कृष्णप्रेमाधिदेवता
सर्वाधिकं च रूपं च सौभाग्यं मानगौरवम् 2.7.
तपश्चकार सा पूर्वं शतशृङ्गे च पर्वते
कृशां निःश्वासरहितां दृष्ट्वा चन्द्रकलोपमाम्
वरं तस्यै ददौ सारं सर्वेषामपि दुर्लभम्
सौभाग्येन च मानेन प्रेम्णा वै गौरवेण च
वरिष्ठा च गरिष्ठा च संस्तुता पूजिता मया
इत्युक्त्वा जगतां नाथश्चक्रे तच्चेतनां ततः
येषां या याश्च देव्यो वै पूजितास्तस्य सेवया
दिव्यं वर्षसहस्रं च तपस्तप्त्वा हिमालये
सरस्वती तपस्तप्त्वा पर्वते गन्धमादने
लक्ष्मीर्युगशतं दिव्यं तपस्तप्त्वा च पुष्करे 2.7.
सावित्री मलये तप्त्वा द्विजपूज्या बभूव सा
शतमन्वन्तरं तप्तं शंकरेण पुरा विभो